Kasuri Methi : रोजच्या जेवणाला हॉटेलसारखी चव देणारा सिक्रेट मसाला

तुम्ही तुमच्या भाज्यांमध्ये कसुरी मेथी वापरता का? ती का आणि कधी वापरायची, याची योग्य पद्धत तुम्हाला माहितीये का? कसुरी मेथीचे फायदे आणि ती वापरण्याची योग्य पद्धत आज आपण जाणून घेणार आहोत.

जेवणात कसुरी मेथी वापरून पाहा

रोज तीच तीच भाजी खाऊन तुम्हाला कंटाळा आला असेल आणि जेवणाला हॉटेलसारखी चव येत नसेल, तर तुमच्या स्वयंपाकघरात कसुरी मेथी असायलाच हवी. हातावर थोडीशी कसुरी मेथी चुरगळा आणि ती जेवणावर भुरभुरा. साध्या वरण किंवा भाजीलाही यामुळे लगेच एक मस्त चव आणि सुगंध मिळतो. शिवाय, तुमची पचनक्रिया सुधारण्यासाठीही ती खूप फायदेशीर ठरते.

कसुरी मेथी नक्की काय प्रकार आहे?

कसुरी मेथी म्हणजे उन्हात वाळवलेली मेथीची पानं. तुम्ही ती घरच्या घरी सहज बनवू शकता! मेथीची ताजी पानं धुवा आणि उन्हात किंवा मायक्रोवेव्हमध्ये वाळवा. ती कुरकुरीत झाल्यावर हलकीशी कुस्करा आणि हवाबंद डब्यात साठवा. तिचा सुगंध टिकवून ठेवण्यासाठी नेहमी काचेची किंवा स्टीलची बरणी वापरा आणि तिला ओलाव्यापासून दूर ठेवा. यात लोह, कॅल्शियम, मॅग्नेशियम आणि पोटॅशियम भरपूर असतं. ती तुमची रोगप्रतिकारक शक्ती वाढवते आणि कोलेस्ट्रॉल नियंत्रित ठेवायला मदत करते.

कोणत्या रेसिपीसाठी वापरू शकता?

पनीर किंवा बटाट्यासारख्या भाज्यांमध्ये कांदा परतताना किंवा अगदी शेवटी एक चमचा कसुरी मेथी टाका, यामुळे हॉटेलसारखी चव येते. वरणाला फोडणी देताना जिरे आणि लसणासोबत ती टाका, मस्त सुगंध येईल. बटर चिकनसारख्या नॉन-व्हेज पदार्थांमध्ये स्मोकी फ्लेवर आणण्यासाठी वाढण्यापूर्वी ती भुरभुरा. तुम्ही पराठ्याच्या पिठातही ती मळू शकता किंवा भजी आणि समोस्यांवर टाकून त्यांची चव आणखी वाढवू शकता. हा एक छोटासा पदार्थ तुमच्या जेवणाची चव पूर्णपणे बदलून टाकतो!