Ayurvedic Hookah : बाबा रामदेव यांनी सांगितली आयुर्वेदिक हुक्का बनवण्याची पद्धत, म्हणाले - बंद नाक मोकळं होईल
सार
योगगुरू बाबा रामदेव यांनी आयुर्वेदिक हुक्का कसा बनवायचा याची पद्धत सांगितली आहे. या हुक्क्याचे काय फायदे आहेत, हेदेखील त्यांनी स्पष्ट केलं आहे.
मुंबई : आजकाल तरुणांमध्ये ई-सिगारेट आणि फ्लेवर्ड हुक्क्याची मोठी क्रेझ आहे. पण हे आरोग्यासाठी खूपच धोकादायक आहे. आरोग्य तज्ज्ञ नेहमीच यापासून दूर राहण्याचा सल्ला देतात. ई-सिगारेट आणि फ्लेवर्ड हुक्क्यामधील केमिकल्स आणि तंबाखूमुळे फुफ्फुसांचं मोठं नुकसान होतं. यामुळे कॅन्सरसारख्या गंभीर आजारांचा धोकाही वाढतो.
याच पार्श्वभूमीवर योगगुरू बाबा रामदेव यांचा एक जुना व्हिडिओ पुन्हा चर्चेत आला आहे. यामध्ये त्यांनी आयुर्वेदिक हुक्क्याबद्दल माहिती दिली आहे आणि काही औषधी वनस्पती वापरण्याची पद्धत सांगितली आहे.
आयुर्वेदिक हुक्क्यासाठी काय काय लागतं?
बाबा रामदेव यांच्या म्हणण्यानुसार, आयुर्वेदिक हुक्का बनवण्यासाठी चिमूटभर मुलेठी (ज्येष्ठमध), चिमूटभर हळद, चिमूटभर मोहरी, थोडंसं गाईचं तूप, काकड शिंगी आणि देशी कापूर लागतो.
आयुर्वेदिक हुक्का कसा बनवायचा?
सगळ्यात आधी मुलेठी थोडी कुटून घ्या आणि त्यात गाईचं तूप मिसळा. त्यानंतर त्यात चिमूटभर हळद आणि मोहरी टाका. हुक्क्याच्या प्लेटवर कापूर जाळून त्यावर काकड शिंगी ठेवा. बाबा रामदेव सांगतात की, हे मिश्रण हुक्क्यातून ओढल्यामुळे बंद नाक मोकळं होतं. खोकल्यासारख्या समस्यांवरही आराम मिळू शकतो. तसंच, वात, पित्त आणि कफ यांचं संतुलन राखायलाही मदत होते.
त्याचवेळी, बाबा रामदेव यांनी ई-सिगारेट आणि फ्लेवर्ड हुक्क्यापासून दूर राहण्याचा सल्लाही दिला आहे, कारण त्यातील केमिकल्स आणि तंबाखू आरोग्याला गंभीर नुकसान पोहोचवू शकतात. कोणताही उपाय वैद्यकीय उपचारांना पर्याय म्हणून वापरण्यापूर्वी तज्ज्ञ डॉक्टरांचा सल्ला घेणं महत्त्वाचं आहे.