Best Pressure Cooker : कुकर घेताय? ॲल्युमिनियम की स्टील, कोणता बेस्ट? आधी हे नक्की वाचा
नवीन कुकर घेताना ॲल्युमिनियम घ्यावा की स्टील, असा प्रश्न अनेकांना पडतो. किंमतीपासून ते टिकण्यापर्यंत या दोन्हीमधील मुख्य फरक समजून घ्या आणि तुमच्यासाठी योग्य कुकर निवडा.
मुंबई : नवीन प्रेशर कुकर घेताना 'ॲल्युमिनियम की स्टेनलेस स्टील?' हा गोंधळ अनेकांच्या मनात असतो. दोन्ही कुकर स्वयंपाकासाठी वापरले जात असले तरी, त्यांचे वजन, टिकण्याची क्षमता, देखभाल आणि किंमत यात मोठा फरक आहे. तुमच्या स्वयंपाकाच्या सवयीनुसार योग्य कुकर निवडणे गरजेचे आहे.
ॲल्युमिनियम कुकर – वजनाला हलका आणि बजेटमध्ये
ॲल्युमिनियम कुकरचे सर्वात मोठे वैशिष्ट्य म्हणजे त्याचे कमी वजन. रोजच्या वापरासाठी हा कुकर उचलण्यास सोयीचा पडतो. शिवाय, स्टील कुकरच्या तुलनेत ॲल्युमिनियम कुकर स्वस्त मिळतात.
ॲल्युमिनियम उष्णतेचा उत्तम वाहक असल्याने हा कुकर लवकर गरम होतो. त्यामुळे भात, वरण आणि भाज्यांसारख्या रोजच्या स्वयंपाकासाठी अनेक जण याचा वापर करतात.
पण ॲल्युमिनियम हा तुलनेने मऊ धातू असल्याने, जास्त काळ वापरल्यास त्यावर ओरखडे पडण्याची शक्यता असते. तसेच, जास्त आंबट किंवा ॲसिडिक पदार्थ यात जास्त वेळ शिजवणे किंवा साठवून ठेवणे टाळावे.