दुपारचे जेवण विसरल्याने मिळाले २५ कोटींचे लॉटरी

हा कामगार घरातून दुपारचे जेवण आणायला विसरला होता. त्याच्या पत्नीने फोन करून आठवण करून दिल्यावर त्याला हे लक्षात आले. त्यानंतर तो एका किराणा दुकानात काही खाण्यासाठी गेला.

ऑफिसला जाताना दुपारचे जेवण घेऊन जायला विसरल्याचा अनुभव अनेकांना येतो. पण असे विसरणे २५ कोटींचे भाग्य घेऊन येईल तर? असाच एक आश्चर्यकारक अनुभव मिसूरीतील एका सामान्य कामगाराला आला.

मिसूरी लॉटरी अधिकाऱ्यांनी दिलेल्या माहितीनुसार, हा कामगार घरातून दुपारचे जेवण आणायला विसरला होता. त्याच्या पत्नीने फोन करून आठवण करून दिल्यावर त्याला हे लक्षात आले. त्यानंतर तो एका किराणा दुकानात काही खाण्यासाठी गेला. त्याच वेळी त्याने लॉटरीचा विचार केला. पण स्क्रॅच गेम त्याला $३ दशलक्ष (२५.२४ कोटी) जिंकून देईल असे त्याने स्वप्नातही पाहिले नव्हते.

“मी सहसा $३० चे तिकीट घेत नाही, पण इतर काही स्क्रॅचर्स तिकिटांवर मला पूर्वी $६० मिळाले होते. म्हणून मी $३० चे तिकीट का घेऊ नये असा विचार केला,” असे लॉटरी विजेत्याने सांगितले.
‌
तिकीट घेतल्यानंतर तो निघणार इतक्यात त्याला स्क्रीनवर लॉटरी विजेता असे लिहिलेले दिसले. त्याला विजयाची अजिबात अपेक्षा नव्हती. ही माहिती त्याला धक्कादायक वाटली. स्क्रीनवर दिसलेल्या आकड्यांनी त्याला आश्चर्यचकित केले, असेही लॉटरी विजेत्याने सांगितले. या विजेत्याचे नाव-गाव जाहीर करण्यात आलेले नाही.

त्यानंतर त्याने आपल्या पत्नीला फोन केला आणि लॉटरी लागल्याचे सांगितले. पण तो नेहमीच विनोद आणि खोड्या करत असल्याने त्याच्या पत्नीने त्याच्यावर विश्वास ठेवला नाही. तिला पटवून देण्यासाठी बराच वेळ लागला, असेही त्याने सांगितले.