साबरमतीत बुलेट ट्रेन स्टेशनचे काम युद्धपातळीवर सुरु

अहमदाबाद-मुंबई बुलेट ट्रेन प्रकल्पातील साबरमती स्टेशनचे काम प्रगत अवस्थेत आहे. ३०० मीटर अंतरावरील विद्यमान रेल्वे स्टेशनशी जोडलेल्या या स्टेशनची चाचणी लवकरच होण्याची शक्यता आहे. हा प्रकल्प अहमदाबाद ते मुंबई अंतर २ तासांत कमी करेल.

अहमदाबाद | प्रतिनिधी साबरमतीत तळपत्या ४२ अंश सेल्सिअसच्या उन्हात देशाच्या पहिल्या बुलेट ट्रेन प्रकल्पाचं काम युद्धपातळीवर सुरू आहे. अहमदाबाद-मुंबई या महत्त्वाकांक्षी हायस्पीड रेल्वे मार्गावर गुजरातमधील हे पहिलं स्टेशन असून, स्टेशनचं काम सर्वात जास्त प्रगत अवस्थेत आहे.

साबरमती येथील हे बुलेट ट्रेन स्टेशन फक्त ३०० मीटर अंतरावर असलेल्या विद्यमान रेल्वे स्टेशनच्या अगदी जवळ असून, प्रवाशांच्या सोयीसाठी सुसज्ज पायाभूत सुविधा विकसित करण्यात येत आहेत. प्रकल्पाच्या या टप्प्यात बांधकाम, प्लॅटफॉर्म स्ट्रक्चर, इलेक्ट्रिकल व सिग्नलिंग यंत्रणा बसवण्याचं काम वेगानं सुरू आहे. गुजरातमधील हा महत्त्वाचा टप्पा असल्याने सध्या सर्वाधिक यंत्रसामग्री व मनुष्यबळ याच ठिकाणी तैनात करण्यात आलं आहे. प्रकल्पाच्या अधिकाऱ्यांनी दिलेल्या माहितीनुसार, स्टेशनचं आराखडा व ढाचागत काम मोठ्या प्रमाणात पूर्ण झालं असून, पुढील काही महिन्यांत येथे चाचणी सुरू होण्याची शक्यता आहे.

देशाच्या पहिल्यावहिल्या हायस्पीड रेल्वे प्रकल्पासाठी केंद्र व राज्य सरकार एकत्रितपणे काम करत असून, या प्रकल्पामुळे अहमदाबाद ते मुंबई दरम्यानचं अंतर अवघ्या २ तासांत कापता येणार आहे. सध्या प्रकल्पाच्या इतर टप्प्यांवरही काम सुरू असून, गुजरातमध्ये साबरमती हे मुख्य केंद्र मानलं जात आहे. बुलेट ट्रेनचं स्वप्न हळूहळू वास्तवात उतरतंय, आणि साबरमती याचा जिवंत पुरावा बनत आहे.