India Sri Lanka Distance : भारत आणि श्रीलंका यांच्यात फक्त 30 किलोमीटरचं अंतर, तरीही रस्ता किंवा रेल्वे मार्ग का नाही?

श्रीलंका हा भारताचा अगदी जवळचा शेजारी देश आहे. या देशाशी आपलं कोणतंही शत्रुत्व नाही. अंतर खूपच कमी असलं तरीही भारतातून श्रीलंकेला रेल्वे मार्ग नाही. तिकडे विमानानेच जावं लागतं. असं का? जाणून घेऊया यामागची कारणं.

भारतापासून श्रीलंका किती दूर आहे?

भारतातील धनुषकोडी आणि श्रीलंकेतील तलाईमन्नार यांच्यात केवळ 24 ते 30 किलोमीटरचं अंतर आहे. इतकं कमी अंतर असूनही या दोन्ही देशांना जोडणारा रस्ता किंवा रेल्वे पूल आजवर बांधला गेलेला नाही. यामागची प्रमुख कारणं म्हणजे राजकीय आणि सुरक्षेचे मुद्दे. भारताशी थेट रस्ता जोडला गेल्यास आपल्या देशाच्या स्वातंत्र्याला आणि नैसर्गिक संरक्षण कवचाला धोका निर्माण होईल, अशी भीती श्रीलंकेतील काही राजकारणी आणि नागरिकांना वाटते. याशिवाय सीमा सुरक्षा, बेकायदेशीर घुसखोरी आणि कस्टम नियंत्रण यांसारख्या आव्हानांमुळे दोन्ही देशांची सरकारं सावधगिरी बाळगतात.

ही कारणंही आहेत महत्त्वाची

दुसरीकडे, धार्मिक भावना आणि नैसर्गिक आपत्तींचा धोका हे देखील या प्रकल्पातील मोठे अडथळे आहेत. या सागरी भागात ऐतिहासिक रामसेतू आहे, ज्याच्याशी हिंदूंच्या भावना जोडलेल्या आहेत. इथे मोठं बांधकाम केल्यास रामसेतूला नुकसान होईल, या भीतीने भाविक तीव्र विरोध करतात. याशिवाय, पाल्कची सामुद्रधुनी वारंवार चक्रीवादळं, त्सुनामी आणि नैसर्गिक आपत्तींना बळी पडते. अशा धोकादायक सागरी वातावरणात सर्व ऋतूंमध्ये तग धरणारा कायमस्वरूपी पूल बांधणं हे इंजिनिअरिंगच्या दृष्टीने अत्यंत गुंतागुंतीचं आणि आव्हानात्मक काम आहे.

खर्चही प्रचंड

पर्यावरण संरक्षण आणि मोठा आर्थिक खर्च हे देखील या पुलाच्या उभारणीत अडथळे ठरले आहेत. या समुद्राच्या तळाशी दुर्मिळ प्रवाळ भित्तिका, समुद्री गवत आणि मौल्यवान जलचर आहेत. जड यंत्रांच्या मदतीने खोदकाम केल्यास या संवेदनशील सागरी परिसंस्थेचं कायमस्वरूपी नुकसान होईल, असा इशारा पर्यावरणवादी देतात. तसंच, समुद्रावर पूल किंवा बोगदा बांधण्यासाठी हजारो कोटी रुपयांची मोठी गुंतवणूक लागेल. सध्याच्या आर्थिक परिस्थितीत एवढा मोठा खर्च करूनही त्या तुलनेत व्यावसायिक फायदा मिळणं कठीण आहे, या विचाराने हा प्रकल्प अद्याप प्रत्यक्षात आलेला नाही.