Gold Diamond Rangoli : 6.5 किलो सोनं आणि 380 कॅरेट हिऱ्यांची दिवाळी रांगोळी, पाहा व्हायरल व्हिडिओ

दिवाळीनिमित्त नेहमीच्या रंगांऐवजी ६.५ किलो सोन्याचे दागिने आणि ३८० कॅरेट हिरे वापरून काढलेली एक भव्य रांगोळी सध्या इंटरनेटवर खूप व्हायरल होत आहे.

हिरे, सोन्याच्या दागिन्यांनी साकारलेली भव्य रांगोळी

दिवाळीच्या निमित्ताने नेहमीच्या रंगांऐवजी कोट्यवधी रुपयांचे सोने आणि हिऱ्यांचे दागिने वापरून काढलेली एक भव्य 'सुवर्ण रांगोळी' इंटरनेटवर व्हायरल झाली असून सर्वांचे लक्ष वेधून घेत आहे. ही केवळ एक साधी सणासुदीची सजावट नसून, पारंपारिक कलाप्रकाराला एक नवीन आणि विलासी रूप देण्यात आले आहे.

२१३ सोने-हिऱ्यांच्या दागिन्यांनी सजलेली रांगोळी

ही पारंपारिक रांगोळी पूर्ण करण्यासाठी एकूण ६.५ किलो वजनाचे २१३ सोने आणि हिऱ्यांचे दागिने अतिशय कुशलतेने वापरण्यात आले आहेत. सोन्याचे नेकलेस, जड बांगड्या, नाजूक कलाकुसर असलेले कानातले आणि पेंडंट्स रांगोळीच्या विशिष्ट बिंदूंवर अत्यंत काळजीपूर्वक मांडले आहेत. या रांगोळीचे सौंदर्य आणि मूल्य अधिक वाढवण्यासाठी ३८० कॅरेटहून अधिक उच्च दर्जाचे हिरे (Fine Diamonds) यात वापरले गेले आहेत.

१० कारागीर... १६ तासांची सलग मेहनत

सोन्याची ही भव्य कलाकृती साकारण्यासाठी अपार संयम आणि अचूकतेची गरज होती. सुमारे १० जणांच्या कारागिरांच्या टीमने सलग १६ तास अखंड मेहनत घेत, प्रत्येक दागिना अत्यंत कल्पकतेने रचून ही रांगोळी तयार केली आहे. घराच्या अंगणात रंगांनी काढल्या जाणाऱ्या नेहमीच्या दिवाळीच्या रांगोळीपेक्षा ही पूर्णपणे वेगळी असून पाहणाऱ्याला थक्क करणारी विलासी कलाकृती ठरली आहे.

सोशल मीडियावर कमेंट्सचा पाऊस

ही सोने-हिऱ्यांची रांगोळी तयार करण्याचा व्हिडिओ सोशल मीडियावर लाखो व्ह्यूज मिळवून व्हायरल होत आहे. एवढ्या कोटींचे मौल्यवान दागिने सार्वजनिक ठिकाणी उघड्यावर प्रदर्शित केलेले पाहून अनेक युजर्सने आश्चर्य व्यक्त केले आहे. असा विलासीपणा आणि दागिने प्रदर्शित करण्याइतपत सार्वजनिक सुरक्षा सहसा फक्त दुबईतच पाहायला मिळते; हे दुबईची आठवण करून देते, अशा प्रतिक्रिया लोक देत आहेत.

पाहुण्यांच्या स्वागतासाठी आणि शुभ शकुनासाठी घराघरात पारंपारिकपणे काढल्या जाणाऱ्या रांगोळीला, ६.५ किलो सोने आणि शेकडो कॅरेट हिऱ्यांनी सजलेल्या या रांगोळीने यंदाच्या दिवाळीत एक नवी आणि चमकदार ओळख दिली आहे.