Honey Trap : दहशतवाद्याची गर्लफ्रेंड, मंत्र्यांच्या मुलांना जाळ्यात ओढण्याचा कट; कोण आहे अर्पिता सरकार?

Who is Arpita Sarkar : सोशल मीडिया इन्फ्लुएन्सर अर्पिता सरकारला पश्चिम बंगालच्या विशेष कृती दलाने अटक केली आहे. जैश-ए-मोहम्मदच्या दहशतवाद्याशी तिचे संबंध होते आणि ती राजकीय नेत्यांना हनीट्रॅप करण्याच्या कटात सामील असल्याचा आरोप तिच्यावर आहे. सध्या या प्रकरणाची चौकशी सुरू आहे.

कोलकाता : दिसायला मॉडर्न, सोशल मीडियावर हजारो फॉलोअर्स... पण प्रत्यक्षात एका दहशतवाद्याची गर्लफ्रेंड आणि हनीट्रॅपच्या जाळ्यात मोठ्या लोकांना अडकवणारी 'एक्स्पर्ट'! ही धक्कादायक कहाणी आहे २२ वर्षांच्या अर्पिता सरकारची (Arpita Sarkar). पश्चिम बंगालच्या विशेष कृती दलाने (STF) एका मोठ्या रॅकेटचा पर्दाफाश केला असून, त्यात अर्पिताचं नाव समोर आलं आहे. जैश-ए-मोहम्मद या दहशतवादी संघटनेशी तिचे संबंध कसे जुळले आणि आपल्या सौंदर्याचा वापर करून ती राजकीय नेत्यांना हनीट्रॅपच्या जाळ्यात कसं ओढणार होती, याबद्दलचे धक्कादायक खुलासे आता समोर येत आहेत. पश्चिम बंगालच्या एका मंत्र्याच्या मुलाला जाळ्यात ओढण्याचा तिचा प्लॅन होता, अशी माहिती समोर आली आहे.

झारखंडच्या साहिबगंजची रहिवासी असलेली २२ वर्षांची अर्पिता सरकार अचानक चर्चेत आली आहे. बाईक रायडिंग, प्रवास आणि लाइफस्टाइलवर व्हिडिओ बनवणाऱ्या अर्पिताचं नाव पाकिस्तान पुरस्कृत दहशतवादी नेटवर्कच्या तपासात येईल, अशी कोणी कल्पनाही केली नव्हती. सुमारे चार वर्षांपूर्वी इन्स्टाग्रामच्या माध्यमातून अर्पिताची ओळख मोहम्मद हमीम मंडल याच्याशी झाली. पुढे या ओळखीचं रुपांतर प्रेमात झालं. पण हमीम हा बंदी घातलेली दहशतवादी संघटना जैश-ए-मोहम्मदच्या नेटवर्कशी जोडलेला होता आणि याच लिंकचा भाग अर्पिताही बनली. 

सोशल मीडियावर सुरू झालेलं हे नातं फक्त एक प्रेम कहाणी होती की यामागे काही मोठा कट होता, हा आता तपासाचा विषय बनला आहे. आपल्या सौंदर्याच्या जोरावर श्रीमंत आणि राजकीय नेत्यांना टार्गेट करून हनीट्रॅप करण्याचा तिचा डाव होता, असं म्हटलं जात आहे. या सर्व प्रश्नांची उत्तरं शोधण्यासाठी पश्चिम बंगाल पोलिसांचं विशेष कृती दल (STF) सातत्याने तपास करत आहे.

इंग्रजी पदवीधर आहे अर्पिता

तपास यंत्रणांच्या माहितीनुसार, अर्पिता इंग्रजी विषयात पदवीधर आहे. ती सोशल मीडियावर प्रवास, मोटरसायकल रायडिंग आणि लाइफस्टाइलशी संबंधित कंटेट तयार करायची. ती झारखंड आणि कोलकाता दरम्यान सतत प्रवास करायची. तिच्या या प्रवासामागचा नेमका उद्देश काय होता आणि या प्रवासादरम्यान ती कोणाकोणाला भेटली, याचा शोध आता पोलीस घेत आहेत.

डिजिटल पुराव्यांमधून अनेक महत्त्वाचे धागेदोरे समोर आले आहेत. आरोपींचे सोशल मीडिया चॅट्स आणि डिजिटल उपकरणांच्या तपासणीतून अनेक महत्त्वाचे संकेत मिळाले असल्याचं STF ने म्हटलं आहे. तपास अधिकाऱ्यांच्या मते, या संभाषणांमध्ये दिल्लीतील जंतर-मंतर परिसरात अशांतता पसरवणे, पोलिसांचे गणवेश खरेदी करणे आणि प्रभावशाली व्यक्तींशी संपर्क साधण्याची योजना असल्याचे उल्लेख आहेत. या दाव्यांची पडताळणी करण्यासाठी डिजिटल फॉरेन्सिक तपासणीही केली जात आहे.

नात्यापलीकडचा तपास

अर्पिता सरकारच्या अटकेनंतर हे प्रकरण आता केवळ प्रेमसंबंधांपुरतं मर्यादित राहिलेलं नाही. तपास यंत्रणा तिची डिजिटल रेकॉर्ड्स, सोशल मीडिया चॅट्स, बँक व्यवहार आणि झारखंड ते कोलकाता प्रवासाची कसून चौकशी करत आहेत. प्राथमिक तपासात अनेक डिजिटल पुरावे सापडले असून, यामागे एक मोठं नेटवर्क असल्याचा संशय अधिकाऱ्यांनी व्यक्त केला आहे. अर्थात, आतापर्यंत समोर आलेले सर्व आरोप तपासाधीन असून, न्यायालयाच्या सुनावणीनंतरच त्यावर शिक्कामोर्तब होईल. पण या प्रकरणामुळे सोशल मीडिया, वैयक्तिक संबंध आणि राष्ट्रीय सुरक्षेबद्दल गंभीर प्रश्न निर्माण झाले आहेत.

बँक व्यवहारांचीही चौकशी

अर्पिता सरकारच्या अटकेनंतर तपास यंत्रणा तिची बँक खाती, डिजिटल ॲक्टिव्हिटी, सोशल मीडियावरील संपर्क आणि कोलकाता भेटींची सविस्तर चौकशी करत आहेत. चौकशी आणि इलेक्ट्रॉनिक पुराव्यांच्या आधारे आणखी मोठे खुलासे होण्याची शक्यता अधिकाऱ्यांनी वर्तवली आहे. सध्या अर्पिताला पूर्ब बर्दवान येथे आणण्यात आलं असून, तिथे तिला न्यायालयात हजर केलं जाईल. तपास यंत्रणा या प्रकरणाच्या प्रत्येक पैलूची बारकाईने चौकशी करत आहेत. हे लक्षात घेणं महत्त्वाचं आहे की, तपास यंत्रणांचे दावे सध्या न्यायालयीन प्रक्रियेत आहेत आणि कोर्टाच्या सुनावणीनंतरच अंतिम निष्कर्ष समोर येतील.