Domino's Delivery Video: पिझ्झा उलटा फेकून डिलिव्हरी बॉय पसार, टिपिंगवरून इंटरनेटवर जुंपली
सार
एका महिलेने डोमिनोज पिझ्झा डिलिव्हरीचा व्हिडिओ शेअर केला आहे. यात डिलिव्हरी बॉय पिझ्झा चक्क उलटा फेकून देताना दिसतोय. टिप कमी दिल्याने त्याने असं केलं का, असा सवाल महिलेने विचारलाय. यावरून आता सोशल मीडियावर टिपिंग कल्चर आणि ग्राहकांना मिळणाऱ्या सेवेवरून मोठी चर्चा सुरू झाली आहे.
अमेरिकेतील न्यूयॉर्कमधील बुशविक (Bushwick) येथे राहणाऱ्या जस्मिन ऑर्टिझ (Jasmine Ortiz) या महिलेने तिच्या घरातील सीसीटीव्ही फुटेज शेअर केले आहे. यात डोमिनोजचा (Domino's) एक डिलिव्हरी बॉय अत्यंत उद्धटपणे पिझ्झा डिलिव्हर करताना दिसतोय. या व्हिडिओमुळे आता टिपिंग, कस्टमर सर्व्हिस आणि अन्नाची हाताळणी यावर मोठी चर्चा सुरू झाली आहे. व्हिडिओमध्ये दिसतंय की, हा डिलिव्हरी बॉय पूर्णपणे आत न येता अर्ध्या उघड्या दाराजवळच थांबतो. त्यानंतर तो पिझ्झाचा बॉक्स जमिनीवर टाकतो आणि तो बॉक्स चक्क उलटा पडतो. डिलिव्हरी दिल्यानंतर तो तिथून लगेच निघून जातो.
महिलेने डिलिव्हरी बॉयच्या वागणुकीवर उपस्थित केले प्रश्न
जस्मिनने व्हिडिओच्या कॅप्शनमध्ये लिहिलंय की, डोमिनोजच्या कर्मचाऱ्याची वागणूक 'अत्यंत उद्धट' होती. तिने पुढे म्हटलंय की, मी त्याच्याशी काहीही वाईट वागले नव्हते. तरीही त्याने असं का केलं? मी दिलेल्या टिपच्या रकमेवरून त्याने असा राग काढला का? असा प्रश्न तिने विचारला आहे. ग्राहकाने किती टिप दिली, यावरून त्याला मिळणारी वागणूक आणि व्यावसायिकता ठरू नये, असं तिचं म्हणणं आहे. यासोबतच डिलिव्हरीच्या कामासाठी नेमल्या जाणाऱ्या लोकांच्या पात्रतेवरही तिने प्रश्नचिन्ह निर्माण केलं आहे.
A US woman Jasmine Ortiz shared CCTV footage alleging a Domino’s delivery worker threw her food down instead of handing it over, calling the behaviour rude and unprofessional.
It also highlights something many Indians notice: delivery workers in India are often courteous and… pic.twitter.com/PvU3ux3zsu— The News Drill™ (@thenewsdrill) September 19, 2026
टिपिंगवरून नेटकऱ्यांमध्ये दोन गट
या व्हिडिओवर लोकांच्या तीव्र प्रतिक्रिया येत आहेत. अनेकांचे लक्ष पिझ्झा उलटा पडल्याच्या दृश्याकडे गेले आहे. एका युजरने कमेंट करत लिहिलंय, "पिझ्झा फेकून देणं एक वेळ समजू शकतो, पण तो उलटा पडणं खूपच भयंकर आहे." दुसऱ्या एका युजरने महिलेला थेट स्टोअरमध्ये जाऊन त्या डिलिव्हरी बॉयची तक्रार करण्याचा सल्ला दिला आहे. तर काहींनी, ग्राहकापर्यंत पोहोचण्यापूर्वी त्या पिझ्झासोबत आणखी काय काय झालं असेल, अशी शंकाही व्यक्त केली आहे.
मात्र, एका युजरने डिलिव्हरी बॉयची बाजू घेत म्हटलंय की, ग्राहकांनी योग्य टिप दिली पाहिजे. टिप ठरवताना डिलिव्हरीचा खर्चही लक्षात घ्यायला हवा. पण इतर अनेक युजर्सनी हा युक्तिवाद फेटाळून लावला आहे. अन्नाची योग्य हाताळणी करण्यासाठी टिप देण्याची सक्ती नसावी, असं त्यांचं म्हणणं आहे. या एका घटनेमुळे आता इंटरनेटवर टिपिंग कल्चर आणि कस्टमर सर्व्हिसच्या मूलभूत नियमांवरून मोठी चर्चा रंगली आहे.