Vice President Election 2025 : उपराष्ट्रपती पदाच्या निवडणुकीत एनडीएचे सी.पी. राधाकृष्णन विजयी, विरोधकांची 14 मतं फुटल्याचा भाजपाचा दावा

देशात उपराष्ट्रपती पदासाठी झालेल्या निवडणुकीमध्ये एनडीएच्या सी.पी. राधाकृष्णन यांचा विजय झाला. पण यासाठी विरोधकांची मते फुटल्याचा दावा भाजपाकडून केला जात आहे. 

मुंबई : देशाच्या उपराष्ट्रपती पदासाठी मंगळवारी झालेल्या निवडणुकीत ‘एनडीए’चे उमेदवार सी. पी. राधाकृष्णन यांना पहिल्या पसंतीची ४५२ मते मिळाली. विरोधकांची तब्बल १४ मते फुटल्याचा दावा भाजपने केला असून, याबाबत दिल्लीच्या राजकीय वर्तुळात चर्चेला सुरुवात झाली आहे.

मतदानाची आकडेवारी

या निवडणुकीत संसद सदस्य म्हणजेच राज्यसभा आणि लोकसभा सदस्य मतदानास पात्र होते. एकूण ७८८ पैकी सध्या ७८१ सदस्य अस्तित्वात आहेत. यामध्ये निवडणूक जिंकण्यासाठी ३९१ मतांची गरज होती. ‘एनडीए’च्या ४२७ खासदारांनी मतदान केले. दरम्यान, १३ खासदारांनी मतदानात भाग घेतला नाही. त्यामध्ये तेलंगणच्या बीआरएसचे ४, बीजदचे ७, अकाली दलाचा १ आणि १ अपक्ष खासदारांचा समावेश आहे. खदूर साहिब मतदारसंघातून निवडून आलेले अमृतपाल सिंग तुरुंगात असल्याने ते मतदान करू शकले नाहीत.

वायएसआर काँग्रेसच्या समर्थनाचा प्रभाव

निवडणुकीच्या आधीच आंध्र प्रदेशातील जगनमोहन रेड्डी यांच्या वायएसआर काँग्रेस पक्षाने एनडीएच्या उमेदवाराला पाठिंबा देण्याची घोषणा केली. त्यांच्या लोकसभेत ४ आणि राज्यसभेत ७ खासदार असल्याने एनडीएच्या मतांमध्ये थेट ११ ने वाढ झाली. यामुळे ‘एनडीए’ची मते ४३८ वर पोहोचली. याशिवाय विरोधकांची १४ मते फुटल्याचा भाजपचा दावा आहे.

खास पेनाचा वापर आणि अवैध मते

राष्ट्रपती आणि उपराष्ट्रपती निवडणुकीसाठी विशेष पेनाचा वापर केला जातो. या पेनमध्ये खास शाई असते जी पुसता येत नाही. मतदानाची गुप्तता टिकवण्यासाठी या पेनाचा वापर बंधनकारक आहे. कोणी पेनाचा वापर न केल्यास त्यांचे मत अवैध ठरते. २०१७ मध्ये ११ आणि २०२२ मध्ये १५ मते अशा प्रकारे अवैध ठरली होती. यंदाही १५ मते अवैध ठरली.

प्रमुख नेत्यांचा सहभाग

या निवडणुकीत गृहमंत्री अमित शहा, संरक्षणमंत्री राजनाथ सिंह, काँग्रेस अध्यक्षा सोनिया गांधी, राहुल गांधी, मल्लिकार्जुन खर्गे, माजी पंतप्रधान एच. डी. देवेगौडा यांच्यासह अनेक मान्यवर खासदारांनी मतदान केले. मतदानावेळी नितीन गडकरी आणि खर्गे एकत्र दिसल्याचा फोटो समाजमाध्यमांवर व्हायरल झाला. काँग्रेसने त्यावर उपरोधिक प्रतिक्रिया व्यक्त केली.

मतदानाचा उत्साह

दुपारी दीडपर्यंत तब्बल ८० टक्के मतदान झाले होते. यावरून खासदारांच्या उत्साहाचा अंदाज येत होता. निवडणुकीपूर्वीच दिल्लीत दाखल झालेले उमेदवार सी. पी. राधाकृष्णन यांनी नवीन महाराष्ट्र सदनात मुक्काम केला होता. मतदानाच्या दिवशी त्यांनी लोधी रोडवरील श्रीराम मंदिरात पूजा केली.