वंदे भारत स्लीपर: १८० किमी/तास वेग, ८२३ प्रवासी क्षमता

दिल्लीहून रात्री सात वाजता निघून सकाळी आठ वाजता श्रीनगरला पोहोचेल अशी वंदे भारत स्लीपर सेवा असेल.

दिल्ली: देशातील रेल्वे प्रवासात क्रांती घडवणारी वंदे भारत स्लीपर ट्रेन तयार. २६ जानेवारी रोजी हिरवा झेंडा दाखवून या ट्रेनचे उद्घाटन होण्याची शक्यता आहे. दिल्ली-श्रीनगर मार्गावर वंदे भारत स्लीपर ट्रेन सेवा सुरू होणार असल्याचे वृत्त राष्ट्रीय माध्यमांनी दिले आहे. १३६ चेअर कार कोच असलेल्या वंदे भारत ट्रेननंतर, भारतीय रेल्वे १६ स्लीपर कोच असलेल्या वंदे भारत सेवेला सुरुवात करत आहे.

दिल्लीहून रात्री सात वाजता निघून सकाळी आठ वाजता श्रीनगरला पोहोचेल अशी वंदे भारत स्लीपर सेवा असेल. आंतरराष्ट्रीय दर्जाच्या सुरक्षा मानकांनुसार या ट्रेनची रचना करण्यात आली आहे. एसी थ्री टायर, टू टायर, फर्स्ट एसी कोचमध्ये ८२३ प्रवाशांना प्रवास करता येईल. लखनऊ येथील आरडीएसओमधील चाचण्यांनंतर, कमिशनिंगपूर्वीच्या प्रक्रियेसाठी ट्रेन चेन्नई आयसीएफमध्ये पाठवल्या जातील, असे रेल्वे अधिकाऱ्यांनी सांगितले.

नवीन वंदे भारत स्लीपर ट्रेन ताशी १८० किलोमीटर वेगाने धावू शकते. मात्र, सध्या भारतीय रेल्वेच्या परवानगीनुसार ती १६० किलोमीटर वेगाने धावेल. प्रीमियम राजधानी एक्सप्रेस ट्रेनपेक्षा वंदे भारत स्लीपर ट्रेनचा सरासरी वेग जास्त असण्याची अपेक्षा आहे. एका ट्रेनमध्ये १६ प्रवासी कोच असतील. यात ११ एसी ३ टायर कोच, ४ एसी २ टायर कोच आणि एक एसी फर्स्ट क्लास कोचचा समावेश आहे. तसेच, विमानप्रमाणे मॉड्यूलर बायो-व्हॅक्यूम शौचालयेही बसवण्यात आली आहेत.