Uttarakhand Accident : ट्रिपल सीट, सुसाट वेग... बसली जोरदार धडक! उत्तराखंड अपघाताचा अंगावर काटा आणणारा CCTV व्हिडीओ
सार
उत्तराखंडच्या टिहरी गढवालमध्ये एक भीषण अपघात झाला. लंबगाव परिसरात एका स्कूटरची बसला समोरासमोर धडक बसली. या अपघातात स्कूटरवरील तीन तरुण गंभीर जखमी झाले आहेत. या घटनेचा सीसीटीव्ही व्हिडीओ सोशल मीडियावर व्हायरल झाला आहे.
मुंबई : उत्तराखंडच्या टिहरी जिल्ह्यात एक भीषण अपघात झाला आहे. लंबगाव-चौंदर मोटर रोडवर एका स्कूटरची बसला समोरासमोर धडक बसल्याने तीन तरुण गंभीर जखमी झाले आहेत. हा अपघात लंबगाव पोलीस स्टेशन हद्दीतील बौन्सडी पॉवर हाऊसजवळ घडला. पोलिसांनी दिलेल्या माहितीनुसार, बस लंबगावहून ऋषिकेशकडे जात होती, तर स्कूटर स्याल्गीच्या दिशेने येत होती. बौन्सडी पॉवर हाऊसजवळच्या वळणावर हा अपघात झाला.
CCTV footage captures a serious collision in Lambgaon, Tehri Garhwal.
Three youths riding a scooter reportedly collided head-on with a bus after the scooter was travelling at high speed.
All three were injured and taken to District Hospital, Tehri, for treatment. pic.twitter.com/wJeCThRSlO— Kumaon Jagran (@KumaonJagran) September 1, 2026
जखमी तरुणांना मोठ्या हॉस्पिटलमध्ये हलवलं
दैनिक भास्करच्या एका रिपोर्टनुसार, जखमी तरुणांची ओळख पटली आहे. संदीप सिंग (वय १९, वडील- गंभीर सिंग), अमित (वय १९, वडील- राजपाल सिंग) आणि सोहनपाल (वय १८, वडील- धनपाल सिंग) अशी त्यांची नावं आहेत. हे तिघेही प्रतापनगरच्या मिश्रवान गावचे रहिवासी आहेत.
घटनेची माहिती मिळताच लंबगाव पोलीस घटनास्थळी पोहोचले. त्यांनी जखमी तरुणांना तातडीने चौंड-लंबगाव येथील कम्युनिटी हेल्थ सेंटरमध्ये दाखल केलं. तिथे प्राथमिक उपचारानंतर, तिघांच्याही जखमा गंभीर असल्याने त्यांना पुढील उपचारांसाठी मोठ्या हॉस्पिटलमध्ये हलवण्यात आलं.
लंबगाव पोलीस स्टेशनचे प्रभारी अशोक रावत यांनी सांगितलं की, हे तिघे तरुण एका व्यक्तीच्या अंत्यसंस्कारावरून लंबगावच्या दिशेने परत येत होते.
CCTV व्हिडीओमुळे सोशल मीडियावर चर्चा
या अपघाताचा सीसीटीव्ही व्हिडीओ सोशल मीडियावर समोर आला आहे. यात तिघे जण बसलेल्या स्कूटरची समोरून येणाऱ्या बसला जोरदार धडक बसल्याचं स्पष्ट दिसतंय.
A serious road accident was captured on CCTV in Lambgaon, Tehri Garhwal, where a scooter carrying three youths collided head-on with a bus.
According to preliminary information, the scooter was travelling at high speed when the collision occurred.
All three riders sustained… pic.twitter.com/M3sFwK573S— Hate Detector 🔍 (@HateDetectors) September 1, 2026
या व्हिडीओवर नेटकऱ्यांनी तीव्र प्रतिक्रिया दिल्या आहेत. एका युझरने रस्त्याच्या कडेला उभ्या असलेल्या पिकअप गाडीला दोष दिला आहे. त्याच्या मते, त्या गाडीमुळे अरुंद रस्त्यावर गाडी चालवणं किंवा अंदाज घेणं कठीण झालं असावं. तर दुसऱ्या एका युझरने ज्या पद्धतीने स्कूटर चालवली जात होती, त्यावर टीका केली आहे.
पोलिसांनी जखमी तरुणांच्या कुटुंबीयांना अपघाताची माहिती दिली असून, अपघाताचं नेमकं कारण शोधण्यासाठी तपास सुरू केला आहे.