Viral Video : भाऊ, शूज पाहिजेत का?; पावसात चप्पल घातलेल्या डिलिव्हरी बॉयला तरुणाने दिले Adidas चे नवे शूज

उत्तराखंडमध्ये पावसात सायकलवरून डिलिव्हरीसाठी आलेल्या झेप्टोच्या (Zepto) एका कर्मचाऱ्याला अमन शर्मा नावाच्या तरुणाने आपले नवे Adidas शूज भेट दिले. या घटनेचा सीसीटीव्ही व्हिडिओ सोशल मीडियावर व्हायरल झाला असून, त्यावर संमिश्र प्रतिक्रिया येत आहेत.

उत्तराखंड : एखादी छोटीशी मदत किंवा सहानुभूती एखाद्याचा संपूर्ण दिवस कसा बदलू शकते, हे दाखवणारा एक व्हिडिओ सध्या सोशल मीडियावर चांगलाच व्हायरल झाला आहे. उत्तराखंडमध्ये, अमन शर्मा नावाच्या एका तरुणाने पावसात चप्पल घालून डिलिव्हरीसाठी आलेल्या एका तरुणाला स्वतःचे नवे Adidas कंपनीचे शूज भेट दिले. अमन शर्मानेच आपल्या इन्स्टाग्रामवर या घटनेचा सीसीटीव्ही व्हिडिओ शेअर केला आहे.

'माझ्यापेक्षा जास्त गरज त्याला होती'

व्हिडिओच्या सुरुवातीला अमनने लिहिले आहे, “या शूजची माझ्यापेक्षा जास्त गरज त्या डिलिव्हरी बॉयला होती.” व्हिडिओमध्ये दिसतं की, अमन आपल्या घराच्या बाल्कनीतून खाली उभ्या असलेल्या डिलिव्हरी पार्टनरला आवाज देतो आणि विचारतो, “भाऊ, शूज पाहिजेत का? ओरिजिनल Adidas चे आहेत.” असं म्हणत तो शूज दाखवतो. त्यानंतर तो खाली जाऊन ते शूज त्या डिलिव्हरी बॉयला देतो.

व्हिडिओमध्ये पुढे तो डिलिव्हरी बॉय सायकलवर शूज घेऊन जाताना दिसतो. अमनने सांगितले की, तो झेप्टो (Zepto) कंपनीचा डिलिव्हरी पार्टनर होता. तो पावसात भिजला होता आणि त्याच्याकडे साधा रेनकोटही नव्हता. तरीही त्याने वेळेवर सायकलवरून ऑर्डर पोहोचवली. त्याच्या पायात फक्त स्लिपर (चप्पल) होती. हे पाहिल्यावरच त्याला आपले नवे शूज देण्याचा निर्णय घेतला, असं अमन म्हणाला.

संमिश्र प्रतिक्रिया, अमनने दिले उत्तर

या व्हिडिओला सोशल मीडियावर संमिश्र प्रतिसाद मिळाला आहे. अनेकांनी अमनच्या या माणुसकीचं कौतुक केलं, तर काहींनी प्रसिद्धीसाठी हा व्हिडिओ बनवला असल्याचा संशय व्यक्त केला. यावर अमनने प्रतिक्रिया दिली आहे. 'हे लक्ष वेधून घेण्यासाठी किंवा प्रसिद्धीसाठी केलेलं नाही. त्या क्षणी मला जे योग्य वाटलं, ते मी केलं,' असं तो म्हणाला. 'एका छोट्याशा मदतीनेही कोणाच्यातरी दिवसात मोठा बदल घडू शकतो, असा माझा विश्वास आहे,' असंही त्याने पुढे सांगितलं.