यूपीत लग्नाच्या मिरवणुकीत राडा; हवाई दलाचा जवान आणि वडिलांवर वऱ्हाड्यांचा हल्ला

UP Baraat Turns Violent Attacks IAF Jawan and Father Over Road Blockage: उत्तर प्रदेशच्या बुलंदशहर जिल्ह्यात एका लग्नाच्या वऱ्हाडातील लोकांनी भारतीय हवाई दलाच्या (IAF) जवानाला आणि त्याच्या वडिलांना बेदम मारहाण केल्याची धक्कादायक घटना घडली आहे.

उत्तर प्रदेशच्या बुलंदशहर जिल्ह्यातून एक धक्कादायक घटना समोर आली आहे. रस्त्यावर दारू पिऊन नाचणाऱ्या वऱ्हाड्यांनी भारतीय हवाई दलाच्या (IAF) एका जवानाला आणि त्याच्या वडिलांना बेदम मारहाण केली. ही घटना १९ फेब्रुवारी रोजी अमरगढ-जहांगीराबाद रस्त्यावर अमरगढ गावाजवळ घडली.

पोलिसांत दाखल केलेल्या तक्रारीनुसार, जितेंद्र सिंह नावाचे एक सरकारी शाळेतील शिक्षक आपल्या मुलासोबत घरी परतत होते. त्यांचा मुलगा प्रथम हा भारतीय हवाई दलात जवान आहे. दोघेही एका कौटुंबिक साखरपुड्याच्या कार्यक्रमातून परत येत होते.

तक्रारीत म्हटलं आहे की, "अर्जदार जितेंद्र सिंह, वडील कै. राज सिंह, राहणार खांडोई गाव, पोलीस स्टेशन नरसेना, जिल्हा बुलंदशहर, हे १९.०२.२०२६ रोजी आपल्या चुलत भावाच्या साखरपुड्यातून जहांगीराबाद येथील आपल्या घरी मुलगा प्रथमसोबत परत येत होते."

संध्याकाळी ५ वाजण्याच्या सुमारास, अमरगढचा रहिवासी असलेल्या आकाश शर्मा याच्या लग्नाची वरात त्याच रस्त्यावरून जात होती. वऱ्हाडी डीजेच्या तालावर नाचत होते आणि त्यांच्यासोबत अनेक नातेवाईकही होते.

तक्रारीनुसार, "ते दारूच्या नशेत रस्त्याच्या मधोमध बाटल्या घेऊन नाचत होते. आम्ही गाडी पुढे काढण्यासाठी हॉर्न वाजवला, तेव्हा त्यांनी आम्हाला शिवीगाळ करण्यास सुरुवात केली."

"जेव्हा अर्जदाराने शिवीगाळीला विरोध केला, तेव्हा अशोक शर्मा आणि आकाश शर्मा यांनी लोखंडी/स्टीलच्या रॉडने हल्ला केला. तर धर्मेंद्र, सचिन, सौरभ, विशाल आणि विवेक यांनी जीवे मारण्याच्या उद्देशाने अर्जदाराला आणि त्याच्या मुलाला काठ्यांनी (दांडक्यांनी) मारहाण केली."

या हल्ल्यात वडील आणि मुलगा दोघेही गंभीर जखमी झाल्याचं तक्रारदाराने म्हटलं आहे. मारहाणीमुळे जितेंद्र सिंह रस्त्यावरच बेशुद्ध पडले.

"यामुळे अर्जदार आणि त्याचा मुलगा दोघांनाही गंभीर दुखापत झाली. दुखापतीमुळे अर्जदार रस्त्यावर बेशुद्ध पडला. या मारहाणीत अर्जदाराचं आणि त्याच्या मुलाचं मनगटी घड्याळ आणि सोन्याची चेन तुटून कुठेतरी पडली."

तक्रारीत पुढे असंही म्हटलं आहे की, स्थानिक लोकांनी गर्दी केल्याने हल्लेखोर तिथून पळून गेले.

"घटनेवेळी घटनास्थळी अनेक लोक जमले आणि त्यांना पाहून आरोपी आम्हाला जीवे मारण्याची धमकी देत पळून गेले."

जितेंद्र सिंह हे सरकारी शाळेत शिक्षक आहेत, तर त्यांचा मुलगा भारतीय हवाई दलात सेवा बजावतो. या घटनेमुळे परिसरात संतापाचं वातावरण असून, आरोपींवर कठोर कारवाई करण्याची मागणी जोर धरू लागली आहे.

या तक्रारीच्या आधारे पोलीस पुढील तपास करत आहेत.