Strange Prayer: पुढच्या जत्रेआधी माझी सासू मरू दे! सुनेचं देवाला अजब साकडं

आजकाल लोक आपल्या इच्छा पूर्ण करण्यासाठी देवाकडे काय काय मागतील याचा नेम नाही. कर्नाटकातील खणदाळ गावात हुलिकांतेश्वर जत्रेत एका महिलेने 'पुढच्या जत्रेच्या आत माझी सासू मरू दे' असं अजब साकडं घातल्याचा प्रकार समोर आला आहे. 

मुगलखोड (कर्नाटक): आपली इच्छा पूर्ण व्हावी म्हणून भक्त देवाला वेगवेगळ्या आणि विचित्र मागण्या करतात, हे तुम्ही-आम्ही अनेकदा ऐकलं असेल. पण कर्नाटकात एक असा प्रकार समोर आला आहे, जो ऐकून तुम्हीही थक्क व्हाल. मुगलखोड शहराजवळच्या खणदाळ गावात १३ ते १७ फेब्रुवारी दरम्यान हुलिकांतेश्वर जत्रा पार पडली. या जत्रेत एका भक्ताने, "माझे कष्ट दूर कर आणि पुढच्या जत्रेच्या आत माझ्या सासूला मृत्यू येऊ दे," असं विचित्र साकडं देवाला घातल्याचं उघड झालं आहे.

पांढऱ्या कागदावर लिहून दानपेटीत टाकली चिठ्ठी

या भक्ताने आपली इच्छा एका पांढऱ्या कागदावर लिहिली. त्यासोबत शंभर रुपयांची नोट जोडली आणि हुलिकांतेश्वर देवाच्या दानपेटीत टाकून प्रार्थना केली.

गावकरीही चक्रावले

१७ फेब्रुवारीला जत्रा संपल्यानंतर हुलिकांतेश्वर जत्रा समितीच्या सदस्यांनी दानपेटी उघडून देणगीची मोजणी सुरू केली. तेव्हा त्यांना ही विचित्र मागणी असलेली चिठ्ठी सापडली. पैसे मोजताना सापडलेल्या या चिठ्ठीचा व्हिडिओ आता सोशल मीडियावर चांगलाच व्हायरल झाला आहे. ही अजब मागणी पाहून, 'हे कोणी केलं असेल?' असा प्रश्न जत्रा समिती आणि गावकऱ्यांना पडला आहे आणि ते चक्रावून गेले आहेत.

इथे सासूच्या त्रासाला कंटाळलेली सून आहे की जावई, हे मात्र कळू शकलेलं नाही. हुलिकांतेश्वर जत्रा समितीचे सदस्य शंकर सुतार यांनी सांगितलं, "ही जत्रा अनेक वर्षांपासून भरते, पण अशी विचित्र मागणी पहिल्यांदाच समोर आली आहे. मंदिरातील दोन वेगवेगळ्या दानपेट्यांमध्ये 'पुढच्या जत्रेच्या आत आमची सासू मरण पावो' अशा आशयाच्या दोन चिठ्ठ्या सापडल्या आहेत. यामुळे स्थानिकांमध्ये चिंतेचं वातावरण आहे."

यावर बोलताना हुलिकांतेश्वर समितीचे अध्यक्ष रामकृष्ण दळवाई यांनी नाराजी व्यक्त केली. ते म्हणाले, "पूर्वीचे भक्त 'आमच्या घरातले सगळे जण एकोप्याने शंभर वर्ष जगू देत' अशा मागण्या करायचे. पण आता 'सासू मरू दे' अशा वेड्यासारख्या विचित्र मागण्या केल्या जात आहेत. ज्यांच्या मनात वडीलधाऱ्यांबद्दल भीती आणि भक्ती नाही, असेच लोक हे करू शकतात."