Diwali Gifts: दिवाळीत कर्मचाऱ्यांना भन्नाट गिफ्ट, स्टार्टअपने दिला थेट बॅक मसाजर
सार
साधारण १३,००० रुपये किमतीचा कल्ट (Cult) ब्रँडचा बॅक मसाजर या गिफ्ट हॅम्परमधील मुख्य आकर्षण आहे. 'दिवसभर एकाच जागी बसून काम केल्याने कर्मचारी थकतात, त्यामुळे हा बॅक मसाजर त्यांच्या नक्कीच उपयोगी पडेल,' असं कंपनीच्या सहसंस्थापकांनी म्हटलं आहे.
दिवाळीच्या निमित्ताने अनेक कंपन्या आपल्या कर्मचाऱ्यांना वेगवेगळ्या प्रकारची गिफ्ट्स देतात. सहसा यात मिठाई आणि सुकामेवा असतो. पण, या परंपरेला फाटा देत उदयपूरच्या 'इन्फ्लुइश' (Influish) नावाच्या एका स्टार्टअपने आपल्या कर्मचाऱ्यांना भन्नाट गिफ्ट्स देऊन सगळ्यांची मनं जिंकली आहेत. रोज तासन्तास एकाच जागी बसून काम करणाऱ्या कर्मचाऱ्यांचा थकवा दूर करण्यासाठी आणि त्यांना रिलॅक्स वाटण्यासाठी कंपनीने खास प्रोडक्ट्स गिफ्ट म्हणून दिली आहेत.
कंपनीने दिलेल्या दिवाळी गिफ्ट हॅम्परमध्ये बॅक मसाजर, बेक केलेले पदार्थ आणि एक मस्त बेड कम्फर्टर यांचा समावेश आहे. स्टार्टअपचे सहसंस्थापक संकल्प नाग यांनी 'द व्हायरल स्टार्टअप ऑफिस' या इन्स्टाग्राम पेजवर याचा एक व्हिडीओ शेअर केलाय, ज्यावर लोक भरभरून कमेंट्स करत आहेत.
व्हिडीओमध्ये नाग दाखवत आहेत की कसं ऑफिसमध्ये प्रत्येक कर्मचाऱ्याच्या डेस्कवर हे गिफ्ट्स ठेवण्यात आले आहेत. 'मोठमोठ्या कंपन्या कर्मचाऱ्यांना भारी गिफ्ट्स देण्याच्या फक्त गप्पा मारतात, पण आम्ही ते प्रत्यक्षात करून दाखवलंय,' असं ते या व्हिडीओमध्ये म्हणत आहेत.
या गिफ्टमधलं मुख्य आकर्षण म्हणजे साधारण १३,००० रुपये किमतीचा कल्ट (Cult) ब्रँडचा बॅक मसाजर. 'दिवसभर बसून काम केल्यामुळे लोक खूप थकतात, त्यामुळे हा बॅक मसाजर त्यांच्यासाठी नक्कीच फायदेशीर ठरेल,' असंही ते पुढे म्हणाले.
सोशल मीडियावर या उपक्रमाचं जोरदार कौतुक होतंय. दिवाळीच्या सेलिब्रेशननंतरही कर्मचाऱ्यांना उपयोगी पडतील अशी गिफ्ट्स दिल्याबद्दल अनेकांनी मॅनेजमेंटला शाबासकी दिली आहे.
नेटकरी या व्हिडीओवर खूप छान प्रतिक्रिया देत आहेत. 'हे असं गिफ्ट आहे जे कर्मचाऱ्यांची प्रोडक्टिव्हिटी आणि कार्यक्षमता वाढवेल', 'तुमच्या मेहनतीचा आम्ही आदर करतो, हे यातून स्पष्ट दिसतंय', अशा कमेंट्स येत आहेत. काहींनी तर असंही म्हटलंय की मोठ्या मल्टिनॅशनल कंपन्यांच्या गिफ्ट्सपेक्षा हे कितीतरी चांगलं आहे. बऱ्याच जणांनी तर या कंपनीत नोकरीसाठी काही जागा रिकाम्या आहेत का, अशी विचारणाही केली आहे.