Uber Driver: पावसात राइड कॅन्सल केली नाही, प्रवाशाने खुश होऊन दिले २००० रुपये बक्षीस!
सार
एका उबर ड्रायव्हरने मुसळधार पावसातही राइड कॅन्सल करण्यास नकार दिला. त्याच्या या कामावर खुश होऊन एका प्रवाशाने त्याला तब्बल २,००० रुपयांची टिप दिली. ही घटना सध्या सोशल मीडियावर व्हायरल झाली आहे.
एका उबर ड्रायव्हरची गोष्ट सध्या सोशल मीडियावर खूप चर्चेत आहे. मुसळधार पावसात त्याने एका प्रवाशाची राइड कॅन्सल करण्यास नकार दिला. त्याच्या या प्रामाणिकपणावर आणि कामावरील निष्ठेवर खुश होऊन त्या प्रवाशाने त्याला तब्बल २,००० रुपयांची टिप दिली.
X (पूर्वीचे ट्विटर) वर एका प्रवाशाने आपला अनुभव शेअर केला आहे. त्याने सांगितले की, शहरात मुसळधार पाऊस सुरू असताना त्याने उबर बुक केली होती. त्याच्यासोबत त्याची आईदेखील होती. त्यामुळे त्याने ड्रायव्हरला राइड कॅन्सल न करण्याची विनंती केली. सुरेश नावाच्या त्या ड्रायव्हरने केवळ राइड पूर्णच केली नाही, तर प्रवाशांना सुरक्षित घरी पोहोचवण्यासाठी खूप मेहनत घेतली.
प्रवाशाने सांगितले की, पिकअप लोकेशन शोधण्यासाठी सुरेशने जवळपास २० मिनिटं फोनवर बोलून रस्ता शोधला. रस्त्यात पाणी साचल्याने आणि प्रचंड ट्रॅफिकमुळे प्रवासाला जवळपास एक तास लागला, पण तरीही तो शांत आणि संयमी होता.
प्रवाशाने आपल्या X पोस्टमध्ये लिहिले, "त्या @Uber_India ड्रायव्हरचं भलं होवो, ज्याला मी राइड कॅन्सल करू नकोस असं सांगितलं होतं, कारण माझ्यासोबत आई होती. इतक्या मुसळधार पावसातही तो आम्हाला शोधत आला. विशेष म्हणजे, पावसाआधीचे जे दर होते, त्याच दरात तो आला."
या प्रवासाचे बिल फक्त २७९ रुपये झाले होते. पण ड्रायव्हरची मेहनत आणि प्रामाणिकपणा पाहून प्रवाशाने त्याला २,००० रुपयांची टिप दिली.
प्रवाशाने पुढे सांगितले, "राइड फक्त २७९ रुपयांची होती. ड्रायव्हर मुसळधार पावसात आमच्यासाठी आला आणि त्याने राइड कॅन्सल केली नाही. लोकेशन समजत नसताना त्याने थेट व्हॉट्सॲपवर लोकेशन मागितले आणि अखेर पोहोचला. त्याने आम्हा सर्वांना गाडीत बसवले. रस्त्यावर गाडीच्या बोनेटपर्यंत पाणी साचले होते, तरीही त्याने त्या पाण्यातून आपली अर्टिगा गाडी चालवली आणि मला व माझ्या पालकांना घरी सुरक्षित सोडले."
"फक्त सहा किलोमीटर अंतर पार करण्यासाठी त्याला एक तास लागला, पण त्याने कोणतीही तक्रार केली नाही. मी त्याला चांगली टिप दिली. तो खरंच एक देवमाणूस आहे," असेही त्याने पुढे लिहिले.
The ride was for a mere Rs. 279. The driver came for us in heavy rains and didn't cancel. When location was not clear he asked for location on WA directly and finally came. Picked us all. Drove his Ertiga in water logged roads where the water was till the car bonet. Dropped me… https://t.co/xXW4XaFi5S pic.twitter.com/B0DYkgaA33
— Cycle Chain Shankar (@dakuwithchaku) July 31, 2026
ही पोस्ट सोशल मीडियावर वेगाने व्हायरल झाली. नेटकऱ्यांनी ड्रायव्हरच्या कामाचे आणि प्रवाशाच्या उदारपणाचे कौतुक केले आहे.
एका युझरने लिहिले, "तो एक चांगला माणूस आहे आणि तुम्ही त्याला इतकी चांगली टिप दिली, हे खूप छान झालं."
दुसऱ्या एका युझरने आपला अनुभव सांगताना म्हटले, "मी सुद्धा गेल्या वर्षी असंच केलं होतं. अर्धा किलोमीटरचा रस्ता पार करण्यासाठी मला अर्टिगा बुक करावी लागली होती, कारण गाडीच्या अर्ध्या दारापर्यंत पाणी साचलं होतं. १२० रुपयांच्या बिलावर मी त्याला ४०० रुपये टिप दिली होती."
आणखी एका युझरने लिहिले, "मी सुद्धा चांगल्या आणि प्रामाणिक उबर ड्रायव्हर्सना नेहमीच बिलापेक्षा जास्त पैसे देतो."