'एक देश, एक निवडणुक' विधेयक आज लोकसभेत मांडले जाणार, भाजपने व्हीप केला जारी

लोकसभेत 'एक देश एक निवडणुक' विधेयक मांडण्यात येणार आहे. कायदा मंत्री अर्जुन राम मेघवाल हे विधेयक मांडतील आणि भाजपने आपल्या खासदारांना उपस्थित राहण्यासाठी व्हिप जारी केला आहे. विरोधकांनी या विधेयकाला विरोध दर्शविला आहे.

नवी दिल्ली: 'एक देश एक निवडणुक'(One Nation One Election) हे विधेयक आज लोकसभेत मांडले जाणार आहे. भाजपने आपल्या खासदारांना सभागृहात उपस्थित राहण्यासाठी तीन ओळींचा व्हिप जारी केला आहे. कायदा मंत्री अर्जुन राम मेघवाल मंगळवारी लोकसभेत दोन महत्त्वाची विधेयके मांडणार असल्याचे केंद्र सरकारने म्हटले आहे.

संविधान (१२९ सुधारणा) विधेयक २०२४ आणि केंद्रशासित प्रदेश कायदे (दुरुस्ती) विधेयक अशी विधेयकांची अधिकृत नावे आहेत. भाजपने लोकसभा निवडणुकीपूर्वी एक देश, एक निवडणूक असे आश्वासन दिले होते. मेघवाल यांनी लोकसभा अध्यक्ष ओम बिर्ला यांना पुढील चर्चा करण्यासाठी संसदेच्या संयुक्त समितीकडे पाठवण्याची विनंती करणे अपेक्षित आहे.

संयुक्त समिती प्रमाणानुसार स्थापन केली जाईल. भाजपच्या एका पदाधिकाऱ्याने दिलेल्या माहितीनुसार, सर्वात मोठा पक्ष असल्याने भाजप या समितीचा अध्यक्ष असेल. समितीमध्ये त्यांचे अनेक खासदार असतील. मंगळवारी संध्याकाळी लोकसभा अध्यक्ष या समितीच्या स्थापनेची घोषणा करू शकतात.

एक देश एक निवडणुकीला विरोधकांनी केला विरोध

विरोधकांनी एक देश एक निवडणुकीला विरोध केला आहे. राहुल गांधी, ममता बॅनर्जी आणि एमके स्टॅलिन यांच्यासह अनेक विरोधी नेत्यांनी याविरोधात विधाने केली आहेत. याचा फायदा सत्ताधाऱ्यांना होईल, असे विरोधकांचे म्हणणे आहे. दुसरीकडे भाजपचे म्हणणे आहे की, विधानसभा आणि लोकसभा निवडणुका एकाच वेळी घेतल्याने देशातील संसाधने वाचतील. सरकारला काम करण्याची अधिक संधी मिळेल.

देशभरात एकाच वेळी सर्व निवडणुका घेण्याबाबत सूचना देण्यासाठी केंद्र सरकारने माजी राष्ट्रपती रामनाथ कोविंद यांच्या अध्यक्षतेखाली एक समिती स्थापन केली होती. समितीच्या अहवालातील सूचना स्वीकारून केंद्राने ‘वन नेशन वन इलेक्शन’ विधेयक दोन टप्प्यात लागू करण्याचा निर्णय घेतला आहे. पहिल्या टप्प्यात लोकसभा आणि विधानसभा निवडणुका एकाच वेळी होणार आहेत. दुसऱ्या टप्प्यात, स्थानिक स्वराज्य संस्थांच्या निवडणुका (पंचायत आणि नगरपालिका) सार्वत्रिक निवडणुकांच्या १०० दिवसांच्या आत घेतल्या जातील.

आणखी वाचा-