कारगिल युद्धातील नायक ताशी नंग्याल यांचे निधन

बटालिक पर्वतरांगांमध्ये भेस बदलून बंकर बांधणाऱ्या पाकिस्तानी सैनिकांना ताशी नंग्याल यांनी पाहिले होते. 

 दिल्ली: १९९९ मध्ये कारगिल क्षेत्रातील पाकिस्तानी घुसखोरीबद्दल भारतीय सैन्याला माहिती देणारे लडाखचे रहिवासी ताशी नंग्याल यांचे निधन झाले. ते ५८ वर्षांचे होते. या वर्षीच्या सुरुवातीला द्रास येथे झालेल्या २५ व्या कारगिल विजय दिनानिमित्त नंग्याल त्यांची मुलगी सेरिंग डोलकरसोबत उपस्थित होते. ताशी नंग्याल यांच्या निधनाबद्दल भारतीय सैन्याने शोक व्यक्त केला आहे. 

१९९९ च्या कारगिल युद्धादरम्यान पाकिस्तानी घुसखोरीबद्दल भारतीय सैन्याला माहिती देण्यात महत्त्वाची भूमिका बजावणारे लडाखचे मेंढपाळ ताशी नंग्याल होते. १९९९ च्या मे महिन्यात त्यांचा हरवलेला मेंढ्यांचा कळप शोधत असताना बटालिक पर्वतरांगांमध्ये भेस बदलून बंकर बांधणाऱ्या पाकिस्तानी सैनिकांना ताशी नंग्याल यांनी पाहिले. दुर्बिणीने मेंढ्या शोधत असताना पाकिस्तानच्या घुसखोरीचा प्रयत्न ताशी नंग्याल यांच्या निदर्शनास आला. 

परिस्थितीचे गांभीर्य लक्षात घेऊन ताशी नंग्याल यांनी लगेचच ही माहिती भारतीय सैन्याला दिली. त्यानंतर सैन्याने केलेल्या तपासात नंग्याल यांनी दिलेली माहिती खरी असल्याचे सिद्ध झाले. त्यानंतर श्रीनगर-लेह महामार्ग तोडण्याचा पाकिस्तानचा गुप्त हेतू भारतीय सैन्याने उधळून लावला. कारगिल युद्धात भारताच्या लष्करी प्रतिसादाला वेग देण्यात ताशी नंग्याल यांनी दिलेल्या माहितीने महत्त्वाची भूमिका बजावली. नंग्याल यांची सतर्कता भारताच्या युद्धविजयात निर्णायक ठरली.