FASTag Deactivation: जुनी गाडी विकली? FASTag लगेच बंद करा, नाहीतर दुसऱ्याच्या प्रवासाचा टोल तुमच्या खिशातून जाईल!

तुम्ही तुमची जुनी गाडी विकल्यावर FASTag बंद करणं खूप महत्त्वाचं आहे. नाहीतर, गाडीचा नवीन मालक टोल नाक्यांवरून जाईल आणि पैसे तुमच्या बँक खात्यातून कापले जातील. FASTag बंद कसा करायचा आणि शिल्लक पैसे परत कसे मिळवायचे? चला जाणून घेऊया.

अनेक लोकांना वाटतं की जुनी गाडी विकल्यावर RC बुक आणि इतर कागदपत्रं नवीन मालकाच्या नावावर केली की आपलं काम संपलं. पण इथेच ते एक मोठी चूक करतात. ती म्हणजे गाडीवरचा FASTag (फास्टॅग) बंद करायला विसरणं. जर तुम्ही हे केलं नाही, तर तुमच्या बँक खात्यातून विनाकारण पैसे कट होत राहतील.

जुनी गाडी विकली असेल तर लगेच FASTag बंद करा

तुम्ही गाडी विकल्यानंतरही जर FASTag चालू राहिला, तर त्या गाडीचा नवीन मालक जेव्हा-जेव्हा टोल नाक्यावरून जाईल, तेव्हा टोलचे पैसे तुमच्याच बँक खात्यातून कापले जातील. अनेकदा असे पैसे कापले गेल्यावरच लोकांना कळतं की आपला FASTag अजूनही अॅक्टिव्ह आहे.

FASTag बंद का करायला हवा?

FASTag म्हणजे गाडीच्या पुढच्या काचेवर चिकटवलेलं एक स्टिकर. यात रेडिओ फ्रिक्वेन्सी आयडेंटिफिकेशन (RFID) टेक्नॉलॉजी असते. हा टॅग तुमच्या बँक खात्याशी किंवा FASTag वॉलेटशी जोडलेला असतो. गाडी टोल नाक्यावरून जाताना तिथला स्कॅनर हा टॅग स्कॅन करतो आणि टोलची रक्कम आपोआप तुमच्या खात्यातून कापली जाते.

तुम्ही गाडी विकल्यानंतर FASTag बंद केला नाही, तर ही सिस्टीम तशीच चालू राहते. त्यामुळे, नवीन मालकाच्या प्रवासासाठी तुमच्या खात्यातून पैसे कापले जाण्याची शक्यता असते.

गाडी विकल्यावर काय करावं?

जेव्हा कुणी आपली गाडी विकतं, तेव्हा जुन्या मालकाने लगेच FASTag देणाऱ्या बँकेशी संपर्क साधून ते खातं किंवा वॉलेट बंद करायला हवं. त्यानंतर, नवीन मालक स्वतःच्या नावाने नवीन FASTag घेऊ शकतो.

FASTag मध्ये शिल्लक पैसे असतील तर?

FASTag बंद करण्यापूर्वी, तुमच्या खात्यात किती बॅलन्स आहे ते तपासा. जर पैसे शिल्लक असतील, तर ते परत कसे मिळवायचे याबाबत संबंधित बँकेला विचारा. प्रत्येक बँकेचे नियम वेगवेगळे असू शकतात, त्यामुळे पैसे परत मिळवण्याची प्रक्रियाही वेगळी असू शकते.

त्यामुळे, FASTag खातं बंद करण्याचा अर्ज देतानाच, पैसे परत मिळवण्याची प्रक्रियाही विचारून घ्या.

FASTag बंद कसा करायचा?

सर्वात आधी, तुमचा FASTag कोणत्या बँकेने दिला आहे, ते तपासा. त्यानंतर त्या बँकेच्या कस्टमर केअर नंबरवर फोन करून किंवा त्यांच्या ऑनलाइन FASTag पोर्टलवरून तुम्ही खातं बंद करण्यासाठी अर्ज करू शकता.

बँकेला स्पष्ट सांगा की तुम्ही गाडी विकली आहे आणि FASTag खातं बंद करायचं आहे. ते तुमचा रजिस्टर्ड मोबाईल नंबर, गाडीचा रजिस्ट्रेशन नंबर अशी माहिती विचारतील. सगळी माहिती तपासल्यावर तुमचा FASTag बंद केला जाईल.

अर्ज केल्यानंतर तुमचा FASTag बंद झाला आहे की नाही, याची खात्री करून घ्या. जर बँकेकडून ही समस्या सुटली नाही, तर तुम्ही FASTag संबंधित तक्रारींसाठी इंडियन हायवेज मॅनेजमेंट कंपनी लिमिटेडच्या (IHMCL) मदत केंद्राशी संपर्क साधू शकता.