Khamenei Protest: खामेनेईंच्या आठवणीत स्वतःला साखळ्यांनी मारहाण

Shia Muslims in Lucknow Protest After Ayatollah Khameneis Death: अमेरिका-इस्त्रायल आणि इराणमध्ये युद्ध सुरू आहे. या युद्धाच्या पहिल्याच दिवशी इराणचे सर्वोच्च नेते अयातुल्ला अली खामेनेई यांचा मृत्यू झाला.

इराणचे सर्वोच्च नेते खामेनेई यांच्या आठवणीत भारतात काश्मीरपासून कन्याकुमारीपर्यंत लोक अश्रू ढाळत आहेत. पण उत्तर प्रदेशची राजधानी लखनौमधील दृश्यं सर्वांनाच धक्का देणारी होती. इथे लाखो लोक रस्त्यावर उतरले आणि आपल्या नेत्याच्या आठवणीत स्वतःला लोखंडी साखळ्यांनी मारहाण करत मातम साजरा केला.

मुस्लिमांचा सर्वात पवित्र सण मानल्या जाणाऱ्या रमजानमध्ये लोक दुःखी होण्याची ही पहिलीच वेळ आहे. रविवारी रात्री लखनौच्या रस्त्यांवरील हे चित्र पाहून सगळेच हळहळले. शिया समुदायाचे लाखो लोक हातात खामेनेईंचे पोस्टर घेऊन अश्रू ढाळत होते. त्यांच्या डोळ्यात पाणी होतं, पण मनात राग होता, म्हणूनच ते अमेरिका-इस्त्रायल मुर्दाबादच्या घोषणा देत होते.

लहान मुलांपासून ते वृद्धांपर्यंत, सगळेच जण नेते खामेनेईंच्या आठवणीत स्वतःला साखळ्यांनी मारहाण करत होते, हे पाहून लखनौमधील लोक थक्क झाले. या लोकांनी 'खामेनेई जिंदाबाद'च्या घोषणा देत बडा इमामबाडापर्यंत कॅण्डल मार्च काढला.

फक्त लखनौच नाही, तर उत्तर प्रदेशातील बहराइच, बाराबंकी, बिजनौर आणि अमरोहा या शहरांमध्येही शिया समुदायाने मिरवणुका काढून अमेरिकेचा पुतळा जाळला. अनेक शहरांमध्ये तरुण आणि मुलांनी मोहरमप्रमाणे स्वतःला साखळ्यांनी मारहाण करून मातम साजरा केला.

लखनौमध्ये शिया समुदायाच्या तरुणांनी सांगितलं की, 'खामेनेईंचं बलिदान व्यर्थ जाणार नाही. ते आमच्या हृदयात आहेत. एक खामेनेई मारला गेला, पण त्यांच्या आठवणीत हजारो उभे राहतील.' अनेक लोकांनी आपल्या घरांवर काळे झेंडे लावून आणि काळे कपडे घालून निषेध व्यक्त केला.