आईवडिलांचं न ऐकता अजितसोबत गेली सना, जळत्या चितेतून मृतदेह काढला!

घरच्यांच्या विरोधात जाऊन दुसऱ्या धर्मातील अजितशी प्रेमविवाह केलेल्या सनाचा संशयास्पद मृत्यू झाला आहे. तिचा मृत्यू टीबीने झाल्याचं पतीने सांगितलं, तर ही हत्या असल्याचा आरोप तिच्या घरच्यांनी केला आहे. जळत्या चितेतून तिचा मृतदेह ताब्यात घेतला आहे.

अजित आणि सना

अजित आणि सना एकमेकांवर प्रेम करत होते. मुलगा दुसऱ्या धर्माचा असल्याने सनाच्या घरच्यांनी लग्नाला कडाडून विरोध केला होता. घरच्यांच्या विरोधाला न जुमानता २१ वर्षीय सनाने अजितसोबत लग्न केले. लग्नानंतर घरच्यांनी तिच्याशी संबंध तोडले होते. आता सनाचा मृत्यू झाला असून, ही हत्या असल्याचा संशय तिच्या घरच्यांनी व्यक्त केला आहे.

विरोधाला न जुमानता लग्न

अजित आणि सना एकमेकांवर प्रेम करत होते. घरच्यांच्या विरोधात जाऊन लग्न केलेले हे जोडपे गेल्या चार वर्षांपासून एकत्र राहत होते. अजित एका फायनान्स विभागात काम करत होता. बुधवारी दुपारी ३ वाजण्याच्या सुमारास सनाचा मृत्यू झाला.

चितेवर जळत होता सनाचा मृतदेह

मुलीच्या मृत्यूची बातमी तिच्या घरच्यांना समजली. बुधवारी संध्याकाळी घाईघाईत तिच्यावर अंत्यसंस्कार केले जात असल्याची माहिती मिळताच, सनाच्या घरच्यांनी पोलिसांना कळवून मृत्यूबाबत संशय व्यक्त केला. पोलिसांनी घटनास्थळी धाव घेऊन जळत्या चितेतून मृतदेह बाहेर काढला. त्यानंतर मृतदेह पोस्टमॉर्टमसाठी पाठवण्यात आला.

अजित पोलिसांच्या ताब्यात

सनाला टीबीचा आजार होता. बुधवारी तिची प्रकृती अचानक बिघडल्याने तिचा मृत्यू झाला, असं अजितने सांगितलं आहे. याप्रकरणी पोलिसांनी अजितला ताब्यात घेऊन त्याची चौकशी सुरू केली आहे. उत्तर प्रदेशातील किरावली भागातील बिजौ गावात ही घटना घडली आहे.

सनाचे पालक काय म्हणाले?

यावर प्रतिक्रिया देताना सनाचे वडील निजाम म्हणाले, 'कर्जाचे पैसे वसूल करण्यासाठी अजित आमच्या घरी यायचा. त्यावेळी त्याची माझ्या मुलीशी ओळख झाली. नंतर त्याने माझ्या अल्पवयीन मुलीशी लग्न केले. आता तिच्या मृत्यूबाबत अनेक शंका आहेत. आम्ही पोहोचलो तेव्हा चिता जळत होती. पोलिसांनी लगेच पाणी टाकून आग विझवली. या प्रकरणाची चौकशी व्हावी,' अशी मागणी त्यांनी केली आहे.