'शक्ती असेल तरच प्रेमाचा संदेश पोहोचतो', सरसंघचालक मोहन भागवत यांचे ठाम विधान

Mohan Bhagwat News: सरसंघचालक मोहन भागवत यांनी जयपूर येथे शक्तीच्या महत्त्वावर भर दिला. त्यांनी सांगितले की, भारताची भूमिका जगात 'मोठ्या भावासारखी' असून, शक्तीच्या आधारावरच जगाला शांततेचा संदेश देता येतो.

जयपूर: सरसंघचालक मोहन भागवत यांनी जयपूर येथे आयोजित एका महत्त्वपूर्ण कार्यक्रमात स्पष्ट शब्दांत सांगितले की, "आपल्याजवळ शक्ती असेल तरच जग प्रेमाची भाषा ऐकायला तयार होतं." त्यांच्या या वक्तव्याने उपस्थितांमध्ये विचारांची एक नवी दिशा निर्माण केली. भागवत म्हणाले, भारताची भूमिका ही जगात 'मोठ्या भावासारखी' असून, आपलं कर्तव्य केवळ स्वतःपुरतं मर्यादित नाही, तर जगाला धर्म आणि मानवतेचा मार्ग दाखवण्याचंही आहे. त्यांनी असंही ठासून सांगितलं की, "विश्वकल्याण हा आमचा धर्म असून धर्माच्या माध्यमातूनच मानवतेची खरी उन्नती शक्य आहे."

'ऑपरेशन सिंदूर'चा संदर्भ

पहलगाममध्ये झालेल्या भीषण दहशतवादी हल्ल्यानंतर भारतीय सैन्याने 'ऑपरेशन सिंदूर' राबवत पाकिस्तानातील दहशतवादी तळ उद्ध्वस्त केले. पाकिस्तानच्या हवाई तळांवरही प्रत्युत्तरात्मक कारवाया करण्यात आल्या, ज्यामुळे संपूर्ण जगानं भारताची सैन्य ताकद पाहिली. याच पार्श्वभूमीवर बोलताना मोहन भागवत यांनी "शक्तीच्या आधारावरच जगाला शांततेचा संदेश देता येतो," असा पुनरुच्चार केला.

"शक्ती ही संवादाची खरी भाषा"

भागवत पुढे म्हणाले की, "भारत विश्वशांती आणि सौहार्द टिकवण्यासाठी नेहमीच प्रयत्नशील आहे. आम्ही कुणाचाही द्वेष करत नाही, पण जोपर्यंत तुमच्याजवळ शक्ती नसेल, तोपर्यंत जग तुमचं म्हणणं गांभीर्यानं घेत नाही." त्यांनी अधोरेखित केलं की, शक्ती ही फक्त सामरिक ताकद नसून ती एक 'सांस्कृतिक आणि आध्यात्मिक ताकद' देखील आहे, जी भारताला जागतिक व्यासपीठावर आपलं स्थान अधिक प्रभावीपणे व्यक्त करू देते.

"भारताचं नेतृत्व मूल्याधिष्ठित आणि सर्वसमावेशक"

शेवटी, भागवत यांनी स्पष्ट केलं की, भारताचं नेतृत्व हे सामर्थ्यावर आधारित असलं, तरी त्याचा गाभा हा मूल्याधिष्ठित आहे. "शक्ती आणि प्रेम यांचा समतोल साधूनच भारत जगात शांतता, सौहार्द आणि सहअस्तित्वाचा संदेश देत राहील," अशी ठाम भूमिका त्यांनी मांडली.