रिलायंस, वायकॉम१८ आणि डिस्नेचा नवा ज्वाइंट वेंचर

मनोरंजनासाठी ज्वाइंट वेंचर: मनोरंजन विश्वात गुरुवारी रिलायंस इंडस्ट्री, वायकॉम१८ आणि डिस्नेने मोठी घोषणा केली आहे. वायकॉम१८ चा मीडिया आणि जियोसिनेमा व्यवसाय स्टार इंडिया प्रायव्हेट लिमिटेडमध्ये विलीन झाला आहे. एनसीएलटी मुंबई, सीसीआय आणि इतर नियामकांच्या मान्यतेनंतर हे विलीनीकरण झाले आहे. आरआयएलने आपल्या विस्तारासाठी ज्वाइंट वेंचरमध्ये ११५०० कोटी रुपयांची गुंतवणूक केली आहे. ज्वाइंट वेंचरने वायकॉम १८ आणि आरआयएलला मालमत्ता आणि रोख रकमेसाठी शेअर्स वाटप केले आहेत.

कंपन्यांनी संयुक्त निवेदनात म्हटले आहे की, व्यवहारा नंतर ज्वाइंट वेंचरची किंमत ७०,३५२ कोटी रुपये आहे. संयुक्त उद्यमावर आरआयएलचा ताबा आहे. यामध्ये आरआयएलचा १६.३४%, वायकॉम१८ चा ४६.८२% आणि डिस्नेचा ३६.८४% हिस्सा आहे.

तीन सीईओ करतील काम

ज्वाइंट वेंचरचे नेतृत्व तीन सीईओ करतील. केविन वाज सर्व प्लॅटफॉर्मवर मनोरंजन संघटनेचे नेतृत्व करतील. किरण मणि संयुक्त डिजिटलच्या प्रभारी असतील. संजोग गुप्ता संयुक्त क्रीडा विभागाचे नेतृत्व करतील. नीता अंबानी संयुक्त उद्यमाच्या अध्यक्षा असतील, तर उदय शंकर उपाध्यक्ष असतील.

RIL ने वायकॉम 18 मध्ये पॅरामाउंट ग्लोबलची हिस्सेदारी खरेदी केली

दरम्यान, एका वेगळ्या व्यवहारात आरआयएलने ४,२८६ कोटी रुपयांमध्ये वायकॉम१८ मध्ये पॅरामाउंट ग्लोबलची १३.०१% ची संपूर्ण हिस्सेदारी खरेदी केली आहे. आता वायकॉम१८ चे मालकी हक्क आरआयएलकडे ७०.४९%, नेटवर्क१८ मीडिया अँड इन्व्हेस्टमेंट्स लिमिटेडकडे १३.५४% आणि बोधि ट्री सिस्टम्सकडे १५.९७% आहेत.

ज्वाइंट वेंचरमुळे नवीन युगाची सुरुवात

ज्वाइंट वेंचर असलेल्या कंपन्यांनी संयुक्त निवेदनात म्हटले आहे की, या वेंचरमुळे भारताच्या मनोरंजन उद्योगात ग्राहकांसाठी एका नवीन युगाची सुरुवात होईल. रिलायन्स आणि डिस्नेचा हा ज्वाइंट वेंचर कंपन्यांचे कंटेंट निर्मिती आणि क्युरेशन कौशल्य, जागतिक दर्जाच्या डिजिटल स्ट्रीमिंग क्षमतांसह डिजिटल प्रथम दृष्टिकोन एकत्र आणतो. यामुळे संयुक्त उद्यमाला भारतीय प्रेक्षकांना आणि जागतिक स्तरावर भारतीय स्थलांतरितांना परवडणाऱ्या दरात उत्तम दर्जाचा कंटेंट देण्यास मदत होईल.