रवी किशन यांची कन्या इशिता शुक्ला सैन्यात दाखल

प्रसिद्ध अभिनेते रवी किशन यांची २१ वर्षीय कन्या इशिता शुक्ला अग्निवीर योजनेअंतर्गत सैन्यात दाखल झाल्या आहेत. बॉलिवूड अभिनेते अनुपम खेर यांच्यासह अनेकांनी इशिताच्या कामगिरीचे कौतुक केले आहे.

नवी दिल्ली: हिंदी चित्रपटसृष्टीतील प्रसिद्ध अभिनेत्याची मुलगी २१ व्या वर्षी सैन्यात दाखल झाली आहे. सैन्यात दाखल झालेल्या मुलीबद्दल अभिनेता अभिमान व्यक्त करत आहेत. हे प्रसिद्ध अभिनेते चित्रपटांसह राजकारणातही सक्रिय असून खासदार आहेत. २१ वर्षीय इशिता शुक्ला भारत सरकारच्या अग्निवीर योजनेअंतर्गत संरक्षण दलात दाखल झाल्या आहेत. मुलगी सैन्यात जावी अशी अभिनेत्याची इच्छा होती. आता वडिलांच्या इच्छेनुसार इशिता सैन्यात दाखल झाल्या आहेत.

सैन्यात दाखल झालेल्या इशिताचे वडील रवी किशन हे भोजपुरी चित्रपटसृष्टीतील प्रसिद्ध अभिनेते आहेत. रवी किशन यांनी हिंदी चित्रपटांमध्येही काम केले आहे. याबाबत बॉलिवूडचे प्रसिद्ध अभिनेते अनुपम खेर यांनीही एक्स अकाउंटवर लिहिले असून रवी किशन यांना शुभेच्छा दिल्या आहेत.

माझे प्रिय मित्र रवी किशन, तुमच्या मुली इशिताबद्दलचा प्रेरणादायी लेख वाचला. तुमची मुलगी इशिता अग्निवीर योजनेअंतर्गत संरक्षण दलात दाखल झाल्याचे समजले. ही बातमी ऐकून खूप आनंद झाला. लाखो मुलींसाठी इशिता प्रेरणास्थान आहे. जय हिंद, असे अनुपम खेर यांनी एक्स अकाउंटवर लिहिले आहे. या ट्विटला नेटकऱ्यांनी रवी किशन आणि इशिताबद्दल कौतुकाची थाप दिली आहे.

अभिनेते रवी किशन यांनीही मुलीच्या या कामगिरीबद्दल ट्विट केले आहे. यापूर्वी १५ जून रोजी दुसऱ्या एका ट्विटमध्ये, "सकाळी माझी मुलगी म्हणाली की तिला अग्निपथ योजनेअंतर्गत सैन्यात जायचे आहे. त्यावर मी तिला तुझ्या मनाप्रमाणे करायला सांगितले," असे लिहिले होते. २१ वर्षीय इशिताचा जन्म १० फेब्रुवारी रोजी जौनपूर येथे झाला. इशिताने दिल्ली विद्यापीठात शिक्षण घेतले आहे. इशिता एनसीसीमध्ये कॅडेट होत्या. इशिताने २०२२ मध्ये एनसीसीचा एडीजी पुरस्कार जिंकला होता. २०२४ मध्ये प्रदर्शित झालेल्या 'लापता लेडीज' या चित्रपटात रवी किशन यांनी पोलिस अधिकाऱ्याची भूमिका साकारली होती.