Rahul Gandhi Net Worth : राहुल गांधींची संपत्ती किती कोटींची? कुठे केलीय गुंतवणूक?

सध्या दिल्लीत आंदोलनांचे वारे वाहत आहेत आणि राहुल गांधी यात महत्त्वाची भूमिका बजावत आहेत. गांधी घराण्याचे वारसदार असलेल्या राहुल गांधींकडे नेमकी किती संपत्ती आहे? त्यांनी कुठे आणि किती गुंतवणूक केली आहे?

राहुल गांधी संपत्ती

राहुल गांधींची वैयक्तिक संपत्ती किती आहे आणि त्यांनी कुठे गुंतवणूक केलीय, हे जाणून घेण्याची सर्वांनाच उत्सुकता असते. २०२४ च्या लोकसभा निवडणुकीत निवडणूक आयोगाला दिलेल्या प्रतिज्ञापत्रानुसार, राहुल गांधींची एकूण संपत्ती २०.३९ कोटी रुपयांपेक्षा जास्त आहे. २०१९ च्या निवडणुकीत त्यांनी आपली संपत्ती १५.८८ कोटी रुपये असल्याचे जाहीर केले होते. म्हणजेच, गेल्या पाच वर्षांत त्यांच्या संपत्तीत सुमारे ४.५ कोटी रुपयांची वाढ झाली आहे.

रोख रक्कम, म्युच्यु्अल फंड, विमा योजना कुठे किती पैसे?

राहुल गांधींनी आपली बहुतांश संपत्ती शेअर्स, म्युच्युअल फंड आणि इतर योजनांमध्ये गुंतवली आहे. प्रतिज्ञापत्रानुसार, त्यांच्याकडे ५५ हजार रुपये रोख आहेत. दोन बँक खात्यांमध्ये मिळून २६.२५ लाख रुपये जमा आहेत. त्यांनी देशातील विविध कंपन्यांच्या शेअर्समध्ये सुमारे ४.३३ कोटी रुपये आणि सात म्युच्युअल फंडांमध्ये ३.८१ कोटी रुपये गुंतवले आहेत. याशिवाय, त्यांच्याकडे १५ लाख रुपयांचे गोल्ड बाँड्स, पीपीएफ आणि विमा योजनांमध्ये ६१.५२ लाख रुपये आहेत. त्यांच्याकडे ४.२० लाख रुपयांचे सोन्याचे दागिने असून, एकूण जंगम मालमत्ता सुमारे ९.२४ कोटी रुपये आहे.

घर, शेतजमीन, ऑफिस...

राहुल गांधींच्या संपत्तीत गुरुग्राममधील त्यांच्या ऑफिसने सर्वांचे लक्ष वेधून घेतले आहे. हरियाणातील गुरुग्राममध्ये एका बहुमजली इमारतीत त्यांच्या नावावर ५,५३८ चौरस फुटांची ऑफिस स्पेस आहे. २०२४ च्या प्रतिज्ञापत्रानुसार, या जागेची किंमत सुमारे ९.०५ कोटी रुपये आहे. तसेच, दिल्लीतील मेहरौली भागात त्यांची शेतजमीन आहे, ज्यामध्ये त्यांची बहीण प्रियांका गांधी वाड्रा यांचीही संयुक्त भागीदारी आहे. त्यांच्या एकूण स्थावर मालमत्तेचे मूल्य सुमारे ११.१५ कोटी रुपये आहे. विशेष म्हणजे, त्यांच्या नावावर स्वतःचे घर किंवा कार नाही.