PV Sindhu : जपानी खेळाडूला धूळ चारत पीव्ही सिंधू एशियन गेम्सच्या उपांत्यपूर्व फेरीत
सार
एशियन गेम्स २०२६ मध्ये महिलांच्या सांघिक बॅडमिंटन स्पर्धेत भारताला जपानकडून पराभव पत्करावा लागला होता. पण आता महिला एकेरीत पीव्ही सिंधूने जपानच्याच खेळाडूला हरवून त्या पराभवाचा वचपा काढला आहे. या विजयासोबतच सिंधू पदकाच्या अगदी जवळ पोहोचली आहे.
मुंबई : चालू एशियन गेम्समध्ये महिलांच्या सांघिक गटात भारताला पदक मिळवून देण्यात अपयश आलं असलं, तरी महिला एकेरीत पीव्ही सिंधू (PV Sindhu) जबरदस्त खेळ दाखवत आहे. शनिवारी झालेल्या महिला एकेरीच्या सामन्यात या हैदराबादी खेळाडूने जपानच्या (Japan) तोमोका मियाझाकीचा (Tomoka Miyazaki) सरळ गेममध्ये पराभव करत उपांत्यपूर्व फेरीत (Quarterfinal) धडक मारली. इचिनोमिया सिटी म्युनिसिपल जिम्नॅशियममध्ये (Ichinomiya City Municipal Gymnasium) झालेल्या या सामन्यात सिंधूने मियाझाकीला २१-९, २१-१३ असं सहज हरवलं. सुरुवातीपासूनच सिंधूने सामन्यावर आपली पकड मजबूत ठेवली होती. जपानी खेळाडूला तिला फारशी टक्कर देता आली नाही.
सिंधूचा सोपा विजय
मियाझाकीविरुद्धच्या या सामन्यात पहिल्या गेमच्या सुरुवातीपासूनच सिंधूने आघाडी घेतली आणि २१-९ अशा फरकाने पहिला गेम जिंकला. दुसऱ्या गेमच्या सुरुवातीला मात्र ती थोडी दबावात दिसली. मियाझाकीने सुरुवातीला आघाडीही घेतली होती. पण भारतीय खेळाडूने लगेचच सामन्यावर नियंत्रण मिळवलं. एका शानदार क्रॉस-कोर्ट स्मॅशच्या मदतीने पॉईंट्स मिळवत सिंधूने पुन्हा आघाडी घेतली. अखेर दुसरा गेमही तिने २१-१३ असा जिंकून सामना खिशात घातला. याआधी दिवसाच्या सुरुवातीला राऊंड ऑफ ३२ च्या सामन्यात सिंधूने चायनीज तैपेईच्या चिऊ पिन-चियानचा पराभव केला होता. आता उपांत्यपूर्व फेरीत मात्र भारताच्या या स्टार खेळाडूसमोर मोठं आव्हान असणार आहे. रविवारी तिचा सामना चीनच्या जागतिक क्रमवारीत चौथ्या स्थानावर असलेल्या चेन युफेईशी होईल. त्यामुळे टॉप ८ च्या या सामन्यात सिंधूला पुन्हा एकदा आपला सर्वोत्तम खेळ दाखवावा लागेल.
एशियन गेम्समध्ये सिंधूची कमाल
गेल्या काही वर्षांत सिंधूला आपला सर्वोत्तम खेळ दाखवता आलेला नाही. तिला दुखापतींचाही सामना करावा लागला. पण तरीही ही स्टार खेळाडू जिद्दीने लढत आहे. ती पुन्हा एकदा आपल्या जुन्या फॉर्ममध्ये परतण्याचा प्रयत्न करत आहे. यंदाच्या एशियन गेम्समध्ये महिलांच्या सांघिक गटातही सिंधूकडून भारताला पदकाची अपेक्षा होती. पण जपानकडून पराभूत झाल्यामुळे भारताचं आव्हान संपुष्टात आलं. आता एकेरीच्या लढतीत त्याच जपानच्या खेळाडूला हरवून सिंधू पदकाच्या अगदी जवळ पोहोचली आहे. तिने आपला फॉर्म आणि फिटनेस असाच टिकवून ठेवला, तर चालू एशियन गेम्समध्ये भारताच्या पदकांमध्ये नक्कीच वाढ होईल.