Purvanchal Expressway Accident: पूर्वांचल एक्स्प्रेस वेवर भीषण अपघात, कार दुभाजकाला धडकून बाप-लेकाचा मृत्यू
सार
उत्तर प्रदेशातील आझमगड जिल्ह्यात पूर्वांचल एक्स्प्रेस वेवर शनिवारी सकाळी एक भीषण अपघात झाला. दिल्लीहून मऊला जाणारी कार दुभाजकाला धडकल्याने दोघांचा मृत्यू झाला, तर तीन जण गंभीर जखमी झाले आहेत.
शनिवारी सकाळी उत्तर प्रदेशच्या आझमगड जिल्ह्यात पूर्वांचल एक्स्प्रेस वेवर एक भयंकर अपघात झाला. दिल्लीहून मऊला जाणारी एक भरधाव कार दुभाजकाला जाऊन धडकली. या भीषण अपघातात दोघांचा जागीच मृत्यू झाला, तर तीन जण गंभीर जखमी झाले आहेत. हे सर्व जण एका नातेवाईकाच्या लग्नाला हजेरी लावून घरी परतत होते.
तहबरपूर पोलीस ठाण्याच्या हद्दीतील ओहोनी गावाजवळ, एक्स्प्रेस वेच्या २१६.२ किलोमीटरवर हा अपघात झाला. चालकाचं नियंत्रण सुटल्याने कार थेट दुभाजकाला धडकली आणि त्याच लेनमध्ये पलटी झाली. धडक इतकी जोरदार होती की कारचा अक्षरशः चक्काचूर झाला आहे.
या अपघाताचं सीसीटीव्ही फुटेजही समोर आलं आहे. यात कार अनियंत्रित होऊन दुभाजकाला धडकत असल्याचं स्पष्ट दिसतंय. गाडी चालवताना चालकाला डुलकी लागल्याने हा अपघात झाला असावा, असा प्राथमिक अंदाज आहे. मात्र, अपघाताचं नेमकं कारण अद्याप समजू शकलेलं नाही.
Purvanchal Expressway 🚨⚠️
Disturbing Visuals 🚨
As per news article, Maruti Ignis was doing around 140kmph at 9am, drowsy driver…2 Dead, 3 injured.
@DriveSmart_IN @RSGuy_India @dabir @InfraEye https://t.co/46qjsznjJ4
— Dave (Road Safety: City & Highways) (@motordave2) October 17, 2026
आझमगडचे (सगरी) सीओ देशराज सिंह यांनी सांगितलं की, कारमध्ये एकूण पाच जण प्रवास करत होते आणि ते सर्वजण जखमी झाले. त्यांना तातडीने विभागीय रुग्णालयात दाखल करण्यात आलं. तिथे उपचारादरम्यान दोघांची प्राणज्योत मालवली. मृतदेह शवविच्छेदनासाठी पाठवण्यात आले आहेत.
घोसी पोलीस ठाण्याच्या हद्दीतील सुलतानपूर गावचे रहिवासी असलेले ५२ वर्षीय सिव्हिल इंजिनिअर शादाब आणि त्यांचे ८३ वर्षीय वडील खुर्शीद अहमद अशी या अपघातात मृत्यू झालेल्यांची नावे आहेत.
या अपघातात शादाब यांची ४५ वर्षीय पत्नी अस्मा बानो, १५ वर्षांची मुलगी मायरा आणि ९ वर्षांचा मुलगा अदनान अहमद हे तिघेही जखमी झाले आहेत. हे कुटुंब दिल्लीतील जामिया नगरमधील हाजी कॉलनीतून एका नातेवाईकाच्या लग्नाला हजेरी लावून मऊ जिल्ह्यातील आपल्या घरी परतत होतं.
अपघाताची माहिती मिळताच उत्तर प्रदेश एक्स्प्रेस वे औद्योगिक विकास प्राधिकरणाच्या (UPEIDA) बचाव पथकाने घटनास्थळी धाव घेतली आणि जखमींना विभागीय रुग्णालयात हलवलं. त्यानंतर अस्मा बानो, मायरा आणि अदनान यांना एका खासगी रुग्णालयात दाखल करण्यात आलं आहे. सध्या अदनानची प्रकृती स्थिर असल्याचं सांगण्यात येत आहे.