दिल्लीतील साऊथ ब्लॉकमधील पंतप्रधान कार्यालय आता इतिहासजमा, ऑफिस सेवा तीर्थमध्ये शिफ्ट!

PM Modi Shifts To New Seva Teerth Office In Delhi : पंतप्रधान नरेंद्र मोदी यांनी सेवा तीर्थचे उद्घाटन करून नवीन कार्यालयात प्रवेश केला. त्यांनी कृषी पायाभूत सुविधा निधी वाढवण्याच्या फाईलवर स्वाक्षरी केली.

PM Modi Shifts To New Seva Teerth Office In Delhi : दिल्लीतील साऊथ ब्लॉकमधील पंतप्रधान कार्यालय आता इतिहासजमा झाले आहे. नव्याने बांधलेल्या सेवा तीर्थमध्ये पंतप्रधान कार्यालय स्थलांतरित झाले आहे. पंतप्रधान नरेंद्र मोदी यांनी सेवा तीर्थचे उद्घाटन करून नवीन कार्यालयात प्रवेश केला. कृषी पायाभूत सुविधा निधी वाढवण्यासह महत्त्वाच्या फाईलवर नरेंद्र मोदी यांनी स्वाक्षरी केली.

13 फेब्रुवारी 1931 रोजी ब्रिटिश भारताची नवी राजधानी म्हणून दिल्लीचे उद्घाटन झाले होते. आता वसाहतवादी काळापासून प्रशासनाचे केंद्र असलेले साऊथ आणि नॉर्थ ब्लॉक ऐतिहासिक स्मारके बनत आहेत. साऊथ ब्लॉकमधील पंतप्रधान कार्यालयात आज शेवटची कॅबिनेट बैठक पार पडली. त्यानंतर पंतप्रधानांनी साऊथ ब्लॉकच्या मागे बांधलेल्या नवीन 'सेवा तीर्थ' नावाच्या ऑफिस कॉम्प्लेक्समध्ये पोहोचून पदभार स्वीकारला. आज मोदींनी चार महत्त्वाच्या फाईल्सवर स्वाक्षरी केली. कृषी पायाभूत सुविधांच्या विकासासाठीची रक्कम दोन लाख कोटी रुपये करण्याच्या योजनेला मोदींनी मंजुरी दिली. स्वयंसहायता गटांद्वारे महिला सक्षमीकरणासाठी असलेल्या 'लखपती दीदी' योजनेअंतर्गत महिलांची संख्या तीन कोटींवरून सहा कोटींपर्यंत वाढवली जाईल.

रस्ते अपघातात जखमी झालेल्यांना दीड लाखांपर्यंत मोफत उपचार सुनिश्चित करणाऱ्या योजनेच्या फाईलवरही मोदींनी सही केली. स्टार्ट-अप इंडिया मिशनसाठी दहा हजार कोटी रुपये राखून ठेवण्याच्या फाईललाही मंजुरी दिली. सेवा तीर्थमध्ये पंतप्रधानांचे कार्यालय, कॅबिनेट बैठकांसाठी विशेष कॉन्फरन्स हॉल आणि नवीन PMO आहे. राष्ट्रीय सुरक्षा परिषद सचिवालय, कॅबिनेट सचिवालय आणि परदेशी पाहुण्यांच्या स्वागतासाठी 'इंडिया हाऊस' हे देखील सेवा तीर्थ कॉम्प्लेक्सचा भाग आहेत. यापूर्वी सेंट्रल सेक्रेटेरिएट 'कर्तव्य भवन' एक आणि दोन या इमारतींमध्ये स्थलांतरित झाले होते. नवीन संसद भवन बांधणाऱ्या नरेंद्र मोदी सरकारने दिल्लीतील सत्ताकेंद्रांचे संपूर्ण रूप बदलून टाकले आहे.