हे कसलं लग्न: कुणाचा मणका मोडला, कुणाचे हात-पाय; स्वागताचं दृश्य होतं वेदनादायी

Truck Accident During Wedding Celebration : छत्तीसगडच्या जांजगीर-चांपा येथे एका लग्नाचा आनंद क्षणार्धात दुःखात बदलला. डीजेच्या तालावर नाचणाऱ्या वऱ्हाड्यांवर एक ट्रक चढला. या घटनेत अनेक जण जखमी झाल्याचे सांगण्यात येत आहे.

छत्तीसगडच्या जांजगीर-चांपा जिल्ह्यातील एका गावात लग्नाचा जल्लोष सुरू होता. वरात आली होती, वऱ्हाडी मंडळी डीजेच्या तालावर नाचत होती. तर दुसरीकडे, वधूचे कुटुंबीय वराच्या स्वागताच्या तयारीत होते. पण त्याचवेळी एक ट्रक आला आणि त्याने लग्नाच्या आनंदावर विरजण घातले, ज्यामुळे आनंदाचे रूपांतर किंकाळ्यांमध्ये झाले.

कुणाचा मणका मोडला, तर कुणाचे हात-पाय तुटले

ही घटना बिर्रा पोलीस ठाण्याच्या हद्दीतील घिवरा गावातील आहे. येथे मंगळवारी रात्री रथू देवांगन यांच्या मुलीचे लग्न होते. वऱ्हाडी मंडळी दारात नाचत होती. याचवेळी एका अनियंत्रित ट्रकने डीजेवर नाचणाऱ्या वऱ्हाड्यांना धडक दिली. यात अनेक जण जखमी झाले. एका व्यक्तीचा मणका मोडला, तर दोन महिलांचे पाय मोडले आणि एकाला छातीला गंभीर दुखापत झाली. यानंतर काही क्षणातच आनंदाचे रूपांतर आक्रोश आणि किंकाळ्यांमध्ये झाले.

वेदनादायी अपघाताने गावात खळबळ उडाली

या घटनेने संपूर्ण गावात खळबळ उडाली. जखमी वऱ्हाड्यांना तातडीने रुग्णालयात दाखल करण्यात आले. या अपघातात चार महिला पाहुण्या गंभीर जखमी झाल्या असून, त्यापैकी एकाची प्रकृती चिंताजनक असल्याने तिला बिलासपूरला हलवण्यात आले आहे. जखमी महिलांमध्ये भुरी बाई (65), राधिका देवांगन, रेणुका देवांगन (55) आणि उषा बाई देवांगन (53) यांचा समावेश आहे.

संतप्त वऱ्हाड्यांनी ट्रक चालकाला चोप दिला

अपघाताची माहिती मिळताच पोलीस घटनास्थळी दाखल झाले आणि त्यांनी ट्रक चालकाविरोधात गुन्हा दाखल करून तपास सुरू केला आहे. संतप्त वऱ्हाड्यांनी चालकाला मारहाण केली, त्यानंतर पोलिसांनी त्याला ताब्यात घेऊन वाहन जप्त केले आहे.