Oracle India Layoff : ओरॅकलने भारतातील 3000 कर्मचाऱ्यांना नोकरीवरुन काढले

ओरॅकलने आपल्या भारतीय टीममधील १०% कर्मचाऱ्यांना कामावरून काढण्याचा निर्णय घेतला आहे. अमेरिका आणि कॅनडामध्येही ही कर्मचारी कपात सुरू झाली असून, याचा सर्वाधिक फटका सॉफ्टवेअर डेव्हलपर्सना बसला आहे. 

नवी दिल्ली : ओरॅकलने आपल्या भारतीय टीममधील १०% कर्मचाऱ्यांना कामावरून काढण्याचा निर्णय घेतला आहे. अमेरिका आणि कॅनडामध्येही कर्मचारी कपात सुरू झाली असून, याचा सर्वाधिक फटका सॉफ्टवेअर डेव्हलपर्सना बसला आहे.

अमेरिकेतील ओरॅकल क्लाउड इन्फ्रास्ट्रक्चर (OCI) विभाग आणि त्यांच्या भारतीय टीममधील कर्मचाऱ्यांना काढण्यात येत आहे. भारतीय टीममधील १०% कर्मचाऱ्यांना कामावरून काढले जाईल. कंपनीने ही कपात पुनर्रचना प्रक्रियेचा भाग असल्याचे म्हटले असले, तरी H-1B व्हिसाच्या नियमांमुळे ऑफशोअरिंग कमी करणे आणि अमेरिकेचे धोरण कमी उदारमतवादी होणे ही या कपातीची प्रमुख कारणे असल्याचे मीडिया रिपोर्ट्समध्ये म्हटले आहे.

भारतातील ओरॅकलच्या कर्मचाऱ्यांना याबाबत माहिती देण्यात आली असली, तरी अमेरिकेतील कर्मचाऱ्यांना अद्याप माहिती देण्यात आलेली नाही. कॅनडामधील कर्मचाऱ्यांना या आठवड्यात माहिती मिळण्याची शक्यता आहे. नेमकी संख्या अद्याप स्पष्ट झालेली नसली, तरी जगातील इतर भागांतील कर्मचाऱ्यांवरही याचा परिणाम होण्याची शक्यता आहे.

आश्चर्याची गोष्ट म्हणजे, ओरॅकल व्हर्जिनियामध्ये नोकऱ्या देत आहे, तर मेक्सिकोमध्ये अनेक कर्मचाऱ्यांना काढून टाकण्यात आले आहे.

ओरॅकलचे भारतात एकूण २८ ते ३० हजार कर्मचारी तर जगभरात सुमारे १.६२ लाख कर्मचारी आहेत. अनेक वर्षांपासून भारत ओरॅकलसाठी एक महत्त्वाचा केंद्रबिंदू राहिला आहे. आता भारतात सुमारे ३ हजार कर्मचारी आपले काम गमावणार आहेत.

काही सूत्रांच्या मते, ओरॅकल आपल्या कामात कृत्रिम बुद्धिमत्तेचा वापर वाढवण्याच्या तयारीत आहे. नुकतेच कंपनीने ओपनएआयसोबत करारही केला आहे. या करारानुसार, डेटा प्रक्रिया करण्यासाठी 'स्टारगेट' प्रकल्पाअंतर्गत, ओपनएआय ओरॅकलच्या सुविधा/व्यवस्था भाड्याने घेईल. हा प्रकल्प ओरॅकल आणि सॉफ्टबँक ग्रुप यांच्यातील करार आहे, ज्यामध्ये एआय पायाभूत सुविधांमध्ये कोट्यवधी डॉलर्सची गुंतवणूक होणार आहे.