Opeation Sindoor : पाकिस्तानने केलेल्या गोळीबारीत जवानांचे बलिदान, 15 नागरिकही शहीद

ऑपरेशन सिंदूरनंतर पाकिस्तानकडून नियंत्रण रेषेवर जोरदार गोळीबारात लान्स नायक दिनेश कुमार शहीद झाले. पुंछ आणि राजौरी सेक्टरमध्ये १५ नागरिक मृत्युमुखी पडले आणि ४३ जखमी झाले. भारतीय सैन्याचा जोरदार प्रतिकार सुरू.

Operation Sindoor : दहशतवाद्यांच्या अड्ड्यांवर भारताने केलेल्या अचूक क्षेपणास्त्र हल्ल्यानंतर पाकिस्तान संतापला आहे. मंगळवारी रात्रीपासून बुधवारी सकाळपर्यंत पाकिस्तानकडून करण्यात आलेल्या अंदाधुंद गोळीबारात भारतीय सैन्याचे लान्स नायक दिनेश कुमार शहीद झाले. तसेच पुंछ, राजौरी आणि टंगधारसारख्या भागात १५ नागरिकांचा मृत्यू आणि ४३ जखमी झाल्याची पुष्टी झाली आहे.

व्हाईट नाईट कॉर्प्सने वाहिली श्रद्धांजली

सैन्याच्या व्हाईट नाईट कॉर्प्सने सोशल मीडिया X वर म्हटले आहे: जीओसी आणि व्हाईट नाईट कॉर्प्सचे सर्व अधिकारी लान्स नायक दिनेश कुमार यांना सलाम करतात ज्यांनी ०७ मे २०२५ रोजी पाकिस्तानच्या गोळीबारात देशासाठी सर्वोच्च बलिदान दिले. सैन्याने गोळीबारात बळी पडलेल्या निष्पाप नागरिकांसोबत एकजूटही दर्शविली.

पाकिस्तानी सैन्याचा अंदाधुंद गोळीबार

माहितीनुसार, ६ मेच्या रात्रीपासून सुरू झालेल्या गोळीबारात पाकिस्तानने नियंत्रण रेषा आणि आंतरराष्ट्रीय सीमेवरील अनेक चौक्यांवरून मोठ्या तोफांचा वापर केला. पुंछ आणि राजौरी सेक्टरमधील अनेक गावांमध्ये घरांचे नुकसान, लोकांचे स्थलांतर आणि रुग्णालयात जखमींची गर्दी पाहायला मिळाली.

‘आम्ही सैन्यासोबत आहोत’: स्थानिक लोक ठाम

पुंछच्या एका ग्रामस्थाने सांगितले की आम्ही महिला आणि मुलांना सुरक्षित स्थळी पाठवले आहे, पण पुरुष गावातच राहतील. ऑपरेशन सिंदूर योग्य आहे. पाकिस्तानच्या कुटील कारस्थानांना आम्ही बळी पडणार नाही.

ऑपरेशन सिंदूर: दहशतवादावर निर्णायक हल्ला

भारतीय सैन्याने ७ मे रोजी पहाटे पीओके आणि पाकिस्तानातील ९ दहशतवादी अड्ड्यांना लक्ष्य केले. पहलगाम हल्ल्याच्या प्रत्युत्तरादाखल करण्यात आलेल्या या हल्ल्यांना ‘ऑपरेशन सिंदूर’ असे नाव देण्यात आले आहे.

स्थिती आणखी बिघडण्याची शक्यता

पाकिस्तान सतत युद्धबंदीचे उल्लंघन करत आहे. भारत सरकारने आंतरराष्ट्रीय समुदायाला स्पष्ट केले आहे की पुढील कोणतीही कारवाई पाकिस्तानची आक्रमकता मानली जाईल आणि भारताकडून "ठाम प्रत्युत्तर" दिले जाईल.