Ola Uber Rapido Strike : आज ओला-उबर-रॅपिडो चालकांचा देशव्यापी संप, ‘ऑल इंडिया ब्रेकडाऊन’मुळे प्रवाशांची गैरसोय

Ola Uber Rapido Strike : तेलंगणा गिग अँड प्लॅटफॉर्म वर्कर्स युनियनच्या नेतृत्वाखाली ओला-उबर-रॅपिडो चालकांचा आज देशव्यापी संप आहे. याशिवाय काही मागण्या देखील चालकांनी केल्या आहेत. 

Ola Uber Rapido Strike : आज, शनिवार ७ फेब्रुवारी रोजी, देशभरातील ओला, उबर आणि रॅपिडोशी संलग्न चालकांनी एक दिवसाचा देशव्यापी संप पुकारला आहे. या संपाअंतर्गत चालकांनी आपले मोबाइल अ‍ॅप्स बंद ठेवण्याचा निर्णय घेतल्याने कार, ऑटो, बाईक आणि टॅक्सी ऑनलाइन बुकिंग सेवा ठप्प राहण्याची शक्यता आहे. त्यामुळे मोठ्या शहरांतील प्रवाशांना आज प्रवासासाठी अडचणींचा सामना करावा लागू शकतो.

 ‘ऑल इंडिया ब्रेकडाऊन’ का पुकारला?

तेलंगणा गिग अँड प्लॅटफॉर्म वर्कर्स युनियन (TGPWU) ने राष्ट्रीय कामगार संघटनांच्या सहकार्याने या संपाची घोषणा केली आहे. युनियनने सोशल मीडिया प्लॅटफॉर्म X वर पोस्ट करत सांगितले की, “किमान भाडे नाही, नियमन नाही आणि चालकांचे अंतहीन शोषण सुरू आहे.” याच कारणांमुळे ७ फेब्रुवारी रोजी देशव्यापी ब्रेकडाऊन पाळण्यात येत आहे.

चालकांच्या मुख्य मागण्या काय?

युनियनचे म्हणणे आहे की अ‍ॅप-आधारित वाहतूक सेवांमध्ये कोणतेही निश्चित भाडे किंवा स्पष्ट नियम नाहीत. कंपन्या मनमानी पद्धतीने भाडे कपात करतात, ज्यामुळे लाखो चालकांना उत्पन्नाच्या असुरक्षिततेला सामोरे जावे लागत आहे. या संदर्भात युनियनने केंद्रीय रस्ते वाहतूक मंत्री नितीन गडकरी यांना पत्र पाठवून सरकारने तातडीने हस्तक्षेप करावा, अशी मागणी केली आहे.

पॅनिक बटणामुळे आर्थिक भार वाढल्याचा आरोप

महाराष्ट्र कामगार सभेने दिलेल्या माहितीनुसार, अनिवार्य पॅनिक बटण बसवण्यामुळे चालकांवर मोठा आर्थिक भार पडत आहे. केंद्र सरकारने मान्यता दिलेल्या १४० पॅनिक डिव्हाइस पुरवठादारांपैकी अनेकांना राज्य सरकारने अमान्य केल्याने, चालकांना जुनी उपकरणे काढून नव्याने बसवावी लागत आहेत. यासाठी प्रत्येकी सुमारे १२ हजार रुपयांचा खर्च येत असल्याचा आरोप करण्यात आला आहे.

उत्पन्न घट आणि विमा प्रश्नावरही नाराजी

ओपन परमिट पॉलिसीमुळे ऑटो रिक्षांची संख्या वाढल्याने उत्पन्नात घट होत असल्याची चिंता चालक संघटनांनी व्यक्त केली आहे. तसेच बेकायदेशीर बाईक टॅक्सी अपघातांमध्ये जखमी किंवा मृत चालकांच्या कुटुंबीयांना विमा लाभ नाकारला जात असल्याचा आरोपही यावेळी करण्यात आला आहे.