पहलगाम हल्ल्यात पाकिस्तानचा हात, NIA चौकशीत धक्कादायक खुलासे

पहलगाम दहशतवादी हल्ल्यात आयएसआय आणि लष्कर-ए-तैयबाचा कट, पाकिस्तानी दहशतवादी आणि स्थानिक ओजीडब्ल्यूचा सहभाग, थ्रीडी मॅपिंग आणि सॅटेलाइट फोन डेटाचे महत्त्वपूर्ण पुरावे समोर आले आहेत.

श्रीनगर : गेल्या महिन्यात जम्मू-काश्मीरमधील पहलगामच्या बैसरन व्हॅलीत झालेल्या दहशतवादी हल्ल्याची चौकशी करणाऱ्या राष्ट्रीय तपास संस्थेने (NIA) आपल्या प्राथमिक अहवालात मोठा खुलासा केला आहे. एनआयएच्या चौकशीत पाकिस्तानचा नापाक चेहरा समोर आला आहे. पहलगाम हल्ला पाकिस्तानची गुप्तचर संस्था आयएसआय आणि दहशतवादी संघटना लष्कर-ए-तैयबा यांच्या संयुक्त कटाचा परिणाम होता.

पाकिस्तानातून आले दहशतवादी, आयएसआयकडून मिळाले आदेश

एनआयएच्या सूत्रांनुसार, या हल्ल्याचा कट लष्कर-ए-तैयबाच्या पाकिस्तानस्थित मुख्यालयात रचला गेला होता. हल्ल्यात सहभागी दोन मुख्य दहशतवादी, हाशिम मूसा उर्फ सुलेमान आणि अली भाई उर्फ तल्हा भाई, हे पाकिस्तानी नागरिक होते. या दोघांनाही आयएसआयच्या वरिष्ठ अधिकाऱ्यांकडून थेट निर्देश मिळत होते.

ओजीडब्ल्यू नेटवर्कने दिली स्थानिक मदत

दोन्ही दहशतवादी हल्ल्याच्या काही आठवड्यांपूर्वी भारतात घुसले होते. स्थानिक ओव्हरग्राउंड वर्कर्स (OGWs) च्या सदस्यांनी त्यांना निवारा, मार्गक्रमण आणि रेकीसारखी आवश्यक मदत दिली. एनआयएने घटनास्थळाचे थ्रीडी मॅपिंग, मोबाइल टॉवर्सचा डंप डेटा आणि ४० हून अधिक काडतुसांची फॉरेन्सिक तपासणी केली आहे. हल्ल्यापूर्वी परिसरात तीन सॅटेलाइट फोन सक्रिय असल्याचे आढळून आले आहे, त्यापैकी दोनचे स्थान आणि सिग्नल शोधण्यात आले आहेत.

२८०० हून अधिक लोकांची चौकशी, १५० ताब्यात

आतापर्यंत २८०० हून अधिक लोकांची चौकशी करण्यात आली आहे. १५० हून अधिक संशयितांना ताब्यात घेण्यात आले आहे. यापैकी काहींचा संबंध प्रतिबंधित जमात-ए-इस्लामी आणि हुर्रियतच्या गटांशी असल्याचे सांगितले जात आहे. बारामुला, पुलवामा, सोपोर, अनंतनाग आणि कुपवाडा यासारख्या भागात एनआयएने अनेक ठिकाणी छापे टाकले आहेत.

आयसी-८१४ अपहरण प्रकरणातील जरगरच्या घरीही छापा

१९९९ मध्ये झालेल्या आयसी-८१४ अपहरण प्रकरणातील आरोपी आणि पाकिस्तानात लपलेला दहशतवादी मुश्ताक अहमद जरगर उर्फ लाटरूम याच्या श्रीनगर येथील घराचीही झडती घेण्यात आली. हे घर २०२३ मध्ये यूएपीए अंतर्गत जप्त करण्यात आले होते.

सीसीटीव्ही फुटेज, प्रत्यक्षदर्शींच्या साक्षीने संकेत

एनआयएने पहलगाम आणि आसपासच्या परिसरातील सीसीटीव्ही फुटेज आणि चेकपोस्टचा डेटा गोळा केला आहे. प्रत्यक्षदर्शींनी सांगितले की दहशतवादी बॉडी कॅमेरा घालून घटना रेकॉर्ड करत होते, ज्यामुळे हल्ल्याचा वापर दहशतवादी प्रचारासाठी केला जाऊ शकतो अशी शक्यता आहे.

झेड-मोर्ह हल्ल्याशी संबंधित कनेक्शन

एनआयएने या हल्ल्याला २०२४ च्या झेड-मोर्ह बोगदा हल्ल्याशीही जोडले आहे, ज्यात ७ लोक मारले गेले होते. दोन्ही घटनांमध्ये एकाच लष्कर-ए-तैयबा समर्थित युनिटचा हात असण्याची शक्यता आहे. हल्ल्यापूर्वी दहशतवादी १५ एप्रिल रोजी पहलगामला पोहोचले होते. चार ठिकाणी बैसरन, अरु, बेताब व्हॅली आणि एका स्थानिक मनोरंजन उद्यानाची रेकी केली.

ओजीडब्ल्यूच्या मदतीने बैसरन निवडले गेले

चार स्थानिक ओजीडब्ल्यूनी त्यांना बैसरनमध्ये राहण्यास, हालचाल समजण्यास आणि कमी सुरक्षेच्या जागेची ओळख करून देण्यास मदत केली. हल्ल्याच्या दोन दिवस आधी त्यांनी पर्यटकांच्या हालचालींचा पूर्ण अभ्यास केला होता. २२ एप्रिल रोजी झालेल्या दहशतवादी हल्ल्यात २६ पर्यटकांना दहशतवाद्यांनी ठार मारले. मृतांमध्ये एक नेपाळी नागरिकही होता.