मनालीत बर्फामुळे वाहनांचा ताबा सुटला; प्रवासी भयभीत

मनाली: हिमाचल प्रदेशातील मनालीत बर्फ पाहण्यासाठी येणाऱ्या पर्यटकांसाठी रस्त्यावरील बर्फाचे थर धोकादायक ठरत आहेत. बर्फाच्या थरांमुळे अनेक वाहनांचा ताबा सुटून ती घसरत आहेत. याच्या भयानक व्हिडिओ सोशल मीडियावर व्हायरल होत आहेत. 

मनालीतील अटल बोगद्याजवळ बर्फाच्छादित रस्त्यावर कारचा ताबा सुटून ती मागे सरकण्याचा भयानक व्हिडिओ सोशल मीडियावर व्हायरल झाला होता. वाहन मागे सरकू लागताच अपघात टाळण्यासाठी चालकाने धावत्या कारमधून उडी मारली, असे व्हिडिओमध्ये दिसत आहे. कारच्या पुढच्या चाकापासून थोड्या अंतरावरून चालक वाचला.

मनालीतील सोलंग व्हॅलीजवळ कार धोकादायकपणे घसरत असल्याचा आणखी एक व्हिडिओ ट्रॅव्हल व्लॉगर हमसा मुर्तझा यांनी गेल्या आठवड्यात शेअर केला होता. बर्फाच्छादित रस्त्यांवर वाहने अडकल्याचे आणि पर्यटक घसरून पडू नये म्हणून प्रयत्न करत असल्याचे व्हिडिओमध्ये दिसत आहे. ९ डिसेंबर रोजी चित्रित केल्याचे वृत्त असलेल्या आपल्या इंस्टाग्राम पोस्टमध्ये हमसा यांनी लिहिले की, परिस्थिती खूपच कठीण आणि अनियंत्रित होती.