Baghpat Plant Theft: पोलिसांचा स्टिकर असलेली कार थांबवली आणि हायवेवरचं झाडच चोरून नेलं!
सार
उत्तर प्रदेशच्या बागपतमधील दिल्ली-डेहराडून इकॉनॉमिक कॉरिडॉरवर एका व्यक्तीने चक्क रस्त्याकडेचं झाड चोरल्याचा प्रकार सीसीटीव्हीमध्ये कैद झाला आहे. बागपत पोलिसांनी सांगितलं की, अद्याप कोणतीही तक्रार आलेली नाही, पण स्थानिक पोलीस या प्रकरणाची चौकशी करत आहेत.
उत्तर प्रदेशच्या बागपतमधील दिल्ली-डेहराडून इकॉनॉमिक कॉरिडॉरवर एका व्यक्तीने चक्क रस्त्याकडेचं झाड चोरल्याचा धक्कादायक प्रकार समोर आला आहे. ही व्यक्ती एका पांढऱ्या रंगाच्या कारमधून आली होती आणि विशेष म्हणजे त्या कारवर पोलिसांचा स्टिकर लावलेला होता. हा सगळा प्रकार सीसीटीव्ही कॅमेऱ्यात कैद झाला आहे. अग्रवाल मंडी टटीरी आणि बडौत या दरम्यानच्या रस्त्यावर ही विचित्र घटना घडली. एक्सप्रेसवेवरील सीसीटीव्ही फुटेजमध्ये स्पष्ट दिसतंय की, एक पांढरी कार रस्त्याच्या कडेला थांबते. त्यानंतर एक माणूस कारमधून बाहेर येतो आणि रस्त्याच्या कडेला लावलेल्या झाडाकडे जातो. तो खाली वाकतो, ते झाड मुळासकट उपटतो आणि कारकडे घेऊन जातो. त्यानंतर तो ते झाड कारमध्ये ठेवतो आणि तिथून निघून जातो.
An unusual theft was reported on the Delhi-Dehradun Expressway in Baghpat after a man was allegedly caught on CCTV removing plants from the highway divider.
According to the footage, a white WagonR bearing the word “POLICE” on it stopped between Agarwal Mandi Tatiri and Baraut… pic.twitter.com/wwbj1xySUH— Hate Detector 🔍 (@HateDetectors) September 30, 2026
या माणसाने कोणतीही घाईगडबड न करता अगदी आरामात हे झाड चोरलं, त्यामुळे हा प्रकार आणखीनच विचित्र वाटतो. या कारवर 'POLICE' असं लिहिलेलं स्पष्ट दिसत असलं, तरी या व्यक्तीचा किंवा कारचा पोलिसांशी खरंच काही संबंध आहे की नाही, हे या फुटेजमधून स्पष्ट होत नाही.
बागपत पोलिसांची व्हायरल पोस्टवर प्रतिक्रिया
सोशल मीडियावर हा व्हिडिओ शेअर झाल्यानंतर तो वाऱ्यासारखा पसरला आणि लोकांचं लक्ष वेधून घेतलं. या व्हायरल पोस्टवर बागपत पोलिसांनी आपली प्रतिक्रिया दिली आहे. बडौत पोलीस ठाण्यात आतापर्यंत या घटनेबाबत कोणतीही माहिती किंवा लेखी तक्रार आलेली नाही, असं पोलिसांनी स्पष्ट केलं आहे.
अवगत कराना है कि उक्त प्रकरण के संबंध में थाना बड़ौत पर वर्तमान तक कोई सूचना अथवा लिखित तहरीर प्राप्त नहीं हुई है। संबंधित एनएचएआई विभाग द्वारा भी उक्त प्रकरण के संबंध में थाना बड़ौत को कोई सूचना नहीं दी गई है। प्रकरण की वास्तविक स्थिति के संबंध में थाना पुलिस द्वारा जानकारी की…
— Baghpat Police (@baghpatpolice) September 30, 2026
संबंधित भारतीय राष्ट्रीय महामार्ग प्राधिकरणाने (NHAI) देखील या प्रकरणाची कोणतीही माहिती पोलीस ठाण्याला दिलेली नाही, असंही पोलिसांनी सांगितलं.
पोलीस सध्या या घटनेची सत्यता आणि नेमकी परिस्थिती तपासत आहेत. चौकशीदरम्यान जी काही माहिती आणि तथ्य समोर येतील, त्या आधारे योग्य ती कायदेशीर कारवाई केली जाईल, असंही पोलिसांनी स्पष्ट केलं आहे.
याआधीही अशीच एक चोरी झाली होती व्हायरल
बागपतच्या या घटनेमुळे डिसेंबर २०२५ मध्ये लखनौमध्ये घडलेल्या अशाच एका प्रकरणाची आठवण ताजी झाली आहे. पंतप्रधान मोदींनी 'राष्ट्र प्रेरणा स्थळा'चं उद्घाटन केल्यानंतर काही वेळातच, कारमधून आलेल्या काही लोकांनी रस्त्याकडची झाडे चोरल्याचा प्रकार कॅमेऱ्यात कैद झाला होता.
त्या घटनेचीही सोशल मीडियावर जोरदार चर्चा झाली होती.
मात्र, बागपतच्या या ताज्या प्रकरणात पोलिसांनी अद्याप त्या व्यक्तीची ओळख पटवलेली नाही किंवा चोरीचा गुन्हा दाखल झाल्याचंही स्पष्ट केलेलं नाही. या व्हायरल फुटेजनंतर सध्या फक्त चौकशी सुरू करण्यात आली आहे, अद्याप कोणताही अधिकृत गुन्हा नोंदवण्यात आलेला नाही.