वंदे भारत एक्सप्रेसच्या टॉयलेटमध्ये साप सोडणाऱ्याला अटक (WATCH)

Vande Bharat snake incident: मुंबई-सोलापूर वंदे भारत एक्सप्रेसमध्ये साप आढळल्याने घबराट पसरल्यानंतर सुमारे दीड महिन्यांनी, रेल्वे संरक्षण दलाने (RPF) बुधवारी एका ३७ वर्षीय व्यक्तीला अटक केली. 

मुंबई: मुंबई-सोलापूर वंदे भारत एक्सप्रेसमध्ये साप आढळल्याने घबराट पसरल्यानंतर सुमारे दीड महिन्यांनी, रेल्वे संरक्षण दलाने (RPF) बुधवारी एका ३७ वर्षीय व्यक्तीला अटक केली. या व्यक्तीने ट्रेनच्या टॉयलेटमध्ये जिवंत साप सोडल्याचा आरोप आहे. सीसीटीव्ही फुटेजच्या सखोल तपासणीनंतर नाशिक जिल्ह्यातील रहिवासी असलेल्या जगन अर्जुन भाले नावाच्या आरोपीला शोधून पकडण्यात आले. ही विचित्र घटना ट्रेन क्रमांक २२२२५ च्या C-16 कोचमध्ये घडली, जेव्हा प्रवाशांना वॉशरूममध्ये एक धामण साप सरपटताना दिसला. साप दिसल्यानंतर कोचमध्ये गोंधळ उडाला.

रेल्वे कर्मचाऱ्यांनी तात्काळ टॉयलेट सील केले आणि पुढील गोंधळ टाळण्यासाठी व प्रवाशांच्या सुरक्षेसाठी कंट्रोल रूमला माहिती दिली. सोलापूरमध्ये सर्पमित्राच्या मदतीने सापाला पकडण्यात आले, अशी माहिती मध्य रेल्वेचे मुख्य जनसंपर्क अधिकारी स्वप्नील निळा यांनी दिली. नंतर तपास अधिकाऱ्यांनी सीसीटीव्ही फुटेज तपासले, ज्यात भाले ठाण्यातून ट्रेनमध्ये चढताना आणि टॉयलेटमध्ये साप सोडताना दिसत असल्याचा आरोप आहे. अधिकारी आता या धक्कादायक कृत्यामागील हेतूचा तपास करत आहेत.