Kuwait Recruitment: कुवेतमध्ये रिक्रूटमेंट एजन्सीने जास्त फी मागितली? आता थेट ऑनलाइन तक्रार करा

कुवेतमध्ये घरकामगारांची भरती करणाऱ्या एजन्सींनी जास्त फी आकारल्यास किंवा पावती न दिल्यास आता थेट तक्रार करता येणार आहे. यासाठी 'पब्लिक अथॉरिटी फॉर मॅनपॉवर'ने 'साहेल' (Sahel) ॲपवर 'रिपोर्ट मी' (Report Me) ही नवीन ऑनलाइन सुविधा सुरू केली आहे.

कुवेत सिटी: कुवेतमध्ये घरकामगारांची (Domestic workers) भरती करणाऱ्या कंपन्या आणि एजन्सींवर आता कडक नजर असणार आहे. जर या एजन्सींनी ठरवून दिलेल्या मर्यादेपेक्षा जास्त फी मागितली किंवा पैसे घेऊन पावती दिली नाही, तर सामान्य नागरिकांना आता थेट तक्रार करता येईल. 'पब्लिक अथॉरिटी फॉर मॅनपॉवर'ने (Public Authority for Manpower) कामगार कायद्यांचे उल्लंघन रोखण्यासाठी 'रिपोर्ट मी' (Report Me) ही नवीन ऑनलाइन सेवा सुरू केली आहे.

कुवेतमधील 'साहेल' (Sahel) ॲपच्या माध्यमातून नागरिक या सुविधेचा वापर करून आपली तक्रार नोंदवू शकतात. सरकारने घरकामगारांच्या भरतीसाठी एक फी निश्चित केली आहे. या नियमांचे उल्लंघन करणाऱ्या आणि पैसे घेऊनही पावती न देणाऱ्या संस्थांविरोधात या ॲपवर तक्रार करता येईल. कामगारांच्या हक्कांचे रक्षण करणे, मानवी तस्करीला आळा घालणे आणि कामगार बाजारातील बेकायदेशीर गोष्टी उघडकीस आणणे, हा या नव्या सिस्टीमचा मुख्य उद्देश आहे. याशिवाय, कामगार कायदे आणि नियमांचे उल्लंघन करणाऱ्या इतर घटनांची माहितीही नागरिक या सेवेद्वारे देऊ शकतात. रिक्रूटमेंट क्षेत्रात पारदर्शकता आणण्यासाठी आणि कामगार तसेच मालकांच्या हक्कांचे संरक्षण करण्यासाठी तपासणी आणि देखरेख अधिक कडक केली जाईल, असे मॅनपॉवर अथॉरिटीने स्पष्ट केले आहे.