वाढदिवसाच्या रात्रीच काळाचा घाला! आर.जी. कर रुग्णालयात लिफ्टच्या दरवाजात अडकून तरुणाचा अंगावर काटा आणणारा अंत

Kolkata hospital lift accident: कोलकात्याच्या आर.जी. कर रुग्णालयात एका ४० वर्षीय व्यक्तीचा सदोष लिफ्टमध्ये चिरडून अत्यंत दुर्दैवी मृत्यू झाला. वाढदिवसाच्या दिवशीच, आपल्या पत्नी आणि तीन वर्षांच्या मुलासमोर घडलेल्या या हृदयद्रावक घटनेप्रकरणी रुग्णालय प्रशासनाच्या हलगर्जीपणावर प्रश्नचिन्ह निर्माण झाले आहे.

कोलकाता: ज्या हातांनी काही तासांपूर्वी आनंदाने वाढदिवसाचा केक कापला, त्याच हातांनी मृत्यूशी झुंज दिली... पण दुर्दैवाने काळ सरसावला. कोलकात्याच्या प्रसिद्ध आर.जी. कर वैद्यकीय महाविद्यालय आणि रुग्णालयात एका ४० वर्षीय व्यक्तीचा लिफ्टमध्ये चिरडून अत्यंत हृदयद्रावक मृत्यू झाला. पत्नी आणि तीन वर्षांच्या चिमुकल्यासमोरच या तरुणाने तडफडून प्राण सोडल्याने संपूर्ण परिसरात हळहळ व्यक्त होत आहे.

नेमकं काय घडलं?

डमडम येथील रहिवासी असलेले अरुप बॅनर्जी आपल्या तीन वर्षांच्या मुलाला (आयुष) दुखापत झाल्यामुळे गुरुवारी रात्री रुग्णालयात आले होते. मुलाच्या हाडाला फ्रॅक्चर असल्याने त्याला शस्त्रक्रियेची गरज होती. पहाटेच्या सुमारास मुलाला स्वच्छतागृहात नेण्यासाठी अरुप, त्यांची पत्नी सोनाली आणि मुलगा 'ट्रॉमा केअर' इमारतीतील लिफ्टमध्ये शिरले. मात्र, ही लिफ्ट त्यांच्यासाठी मृत्यूचा सापळा ठरेल याची कल्पनाही कोणाला नव्हती.

मदतीसाठी आकांत, पण सुरक्षा रक्षक ढिम्म!

पीडित कुटुंबाने रुग्णालय प्रशासनावर गंभीर आरोप केले आहेत. अरुप यांची बहीण पिंकी यांनी सांगितले की, "लिफ्ट कोणत्याही मजल्यावर न थांबता वेड्यावाकड्या वेगाने वर-खाली होत होती. आतून माझा भाऊ मदतीसाठी ओरडत होता, त्याचा आवाज आम्हाला स्पष्ट ऐकू येत होता. आम्ही सुरक्षा रक्षकांना मदतीसाठी विनवण्या केल्या, ओरडून सांगितलं, पण कोणाकडूनही मदत मिळाली नाही."

तपासणीत धक्कादायक वास्तव समोर

पोलीस तपासात आणि शवविच्छेदन अहवालात अरुप यांचा मृत्यू किती भीषण होता, हे स्पष्ट झाले आहे.

दोन दरवाजांत चिरडले गेले: अरुप लिफ्टचे दरवाजे उघडण्याचा प्रयत्न करत असताना दोन्ही दरवाजांच्या फटीत अडकले.

गंभीर दुखापती: छातीवर प्रचंड दाब पडल्यामुळे त्यांचे हृदय, फुफ्फुसे आणि यकृत फाटले होते. हात, पाय आणि बरगड्यांनाही अनेक फ्रॅक्चर्स झाले होते.

प्रशासनाचा हलगर्जीपणा: ज्यावेळी हा अपघात झाला, तेव्हा लिफ्टमध्ये अधिकृत 'लिफ्ट ऑपरेटर' उपस्थित नव्हता.

पाच जणांना बेड्या

या धक्कादायक घटनेनंतर पोलिसांनी तातडीने पावले उचलत, कर्तव्यावर कसूर केल्याप्रकरणी दोन सुरक्षा रक्षक आणि तीन लिफ्ट चालकांना अटक केली आहे. रुग्णालय प्रशासनाने या प्रकरणावर स्पष्टीकरण देताना म्हटले आहे की, अरुप यांना वाचवण्याचे प्रयत्न झाले, परंतु जखमा इतक्या गंभीर होत्या की त्यांचा मृत्यू झाला.

वाढदिवसाच्या आनंदाचे रूपांतर काही तासांतच सुतकात झाल्याने बॅनर्जी कुटुंबावर आभाळ कोसळले आहे. रुग्णालयातील तांत्रिक बिघाड आणि कर्मचाऱ्यांची उदासीनता एका निष्पाप जिवाच्या जीवावर बेतल्याने संताप व्यक्त केला जात आहे.