तुम्हाला भारत भ्रमण करायचेय, या ५ विशेष ट्रेनने करा प्रवास, मिळेल अविस्मरणीय अनुभव

काहीवेळा फक्त विमानाने किंवा रोडनेच नाही तर रेल्वे प्रवासही खूप सुंदर असतो. अशाच काही रेल्वे मार्गांबद्दल येथे सांगितले आहे जे तुम्हाला एक वेगळाच अनुभव देतील.

मुंबई- प्रवास लहान असो वा मोठा, रेल्वेत बसल्यानंतर कुणालाही आराम मिळतो. रेल्वेने प्रवास करण्याचा अनुभव वेगळ्याच पातळीवरचा असतो, जो हृदयाला भिडतो. रेल्वे स्टेशनवरून सुटताच ती क्षणार्धात आपल्याला आपल्या आठवणींमध्ये घेऊन जाईल असे वाटते. पण, डेस्टिनेशनला पोहोचण्यापूर्वी, ती आपल्याला डोंगर, जंगले आणि नद्या अशा अनेक सुंदर दृश्यांमधून घेऊन जाते. तसेच, हे असे मार्ग आहेत जे ढगांमध्ये असल्यासारखे वाटतात. रेल्वे वेग घेत असताना, हलक्या पावसाच्या थेंबांसह येणारा ताजा वारा एक वेगळाच अनुभव देतो. ही दृश्ये तुमचा प्रवास आणखीनच अद्भुत बनवतात. म्हणूनच आज आम्ही भारतातील ५ सर्वोत्तम रेल्वे मार्गांबद्दल सांगत आहोत, जिथे तुम्ही सुंदर दृश्ये पाहू शकता.  

कालका ते शिमला टॉय ट्रेन 
सर्वात सुंदर रेल्वे प्रवासांपैकी एक म्हणजे कालका ते शिमला. हा प्रवास सुमारे ८५.४ कि.मी.चा आहे. हा प्रवास सुंदर दऱ्या, देवदार वृक्ष आणि बर्फाच्छादित शिखरांमधून १०२ बोगद्यांमधून जातो. रेल्वे धरमपूर, बडोग, सोलन, कंडाघाट स्थानकांमधून शिमला गाठते. याचे दर ७० ते ५०० रुपयांपर्यंत आहेत. उर्वरित तुम्ही आयआरसीटीसीच्या वेबसाइटवर किंवा स्टेशनवर रेल्वे आणि वर्गानुसार बुक करू शकता. प्रवासादरम्यान तुम्ही सर्वकाही पाहू शकता  म्हणजे थंड हवा, डोंगरांवरून कोसळणारे धबधबे, खोल दऱ्या...असे त्यांचे फोटो किंवा व्हिडिओही काढू शकता. येथे भेट देण्यासाठी मार्च ते जून हे उत्तम महिने आहेत. या काळात येथील हवामान आल्हाददायक असते. डिसेंबर आणि जानेवारी दरम्यान तुम्ही बर्फवृष्टीही पाहू शकता.   

मंडपम ते रामेश्वरम 
मंडपम ते रामेश्वरम बेटाचे अंतर सुमारे २१.६ किलोमीटर आहे. या रेल्वे मार्गाचे वैशिष्ट्य म्हणजे तो भारताचा पहिला सागरी पूल असलेल्या पंबन पुलावरून धावतो. हा पूल १९१४ मध्ये बांधण्यात आला होता आणि हा समुद्रावरील भारताचा पहिला रेल्वे पूल आहे. हा पूल हिंदी महासागरावर आहे. रेल्वे समुद्रावरून जाते. प्रवासादरम्यान, लाटा उसळतात, नंतर पाणी रेल्वेसोबत जाते. एकंदरीत रेल्वे उडत असल्यासारखे वाटते. रेल्वे मंडपमहून रामेश्वरमला निघाल्यावर काही क्षणांनी निळा समुद्र दिसतो. हवेतील मीठाचा वास आणि थंड पाण्याचे थेंबही तुम्ही अनुभवू शकता. हे दृश्य सूर्योदय किंवा सूर्यास्ताच्या वेळी आणखी सुंदर दिसते.    

जैसलमेर ते जोधपूर
जैसलमेर ते जोधपूर अंतर सुमारे २६६ किलोमीटर आहे. जैसलमेर-जोधपूर एक्सप्रेस आणि डिलक्स एक्सप्रेसमध्ये तुम्ही प्रवास करू शकता. प्रवास करताना खिडकीतून सूर्योदय किंवा सूर्यास्ताच्या वेळी वाळूचा रंग बदलताना  पाहू शकता. वाळू, काटेरी झुडपे, उंट आणि लहान राजस्थानी गावेही दुरून दिसतात. जैसलमेरहून जोधपूरला जाताना, तुम्हाला लहान रेल्वे  स्थानके दिसतील, जी सर्व राजस्थानी रंगात रंगवली आहेत. येथे तुम्हाला स्थानिक जीवन आणि संस्कृतीची झलक पाहायला मिळेल. अनेक वेळा तुम्हाला गावातील मुले रेल्वेकडे हात हलवतानाही  दिसतील.

सिलिगुडी ते दार्जिलिंग 
सिलिगुडी ते दार्जिलिंग अंतर सुमारे ६२.७ किलोमीटर आहे. हा प्रवास ४ ते ५ तासांचा आहे. रेल्वे रस्त्याच्या कडेने जाते. चहाच्या मळ्या, धबधबे आणि गावांमधून जाते. अनेक ठिकाणी, रेल्वे सामान्य लोकांच्या घरांना अगदी जवळून जाते (जणू काही तुम्ही त्यांच्या अंगणातून जात आहात). ही रेल्वे सिलिगुडी जंक्शनहून आपला प्रवास सुरू करते, तिनधरिया घुम स्थानकातून, बटासिया लूपमधून जाते आणि दार्जिलिंग स्थानकावर आपल्या गंतव्यस्थानावर पोहोचते. भेट देण्यासाठी मार्च ते मे आणि ऑक्टोबर ते डिसेंबर हा उत्तम काळ आहे. हे ठिकाण छायाचित्रण, मधुचंद्र आणि मुलांसोबतच्या मजेदार सहलींसाठी प्रसिद्ध आहे. 

मुंबई ते गोवा
मुंबई ते गोवा अंतर सुमारे ५८९ किलोमीटर आहे. रेल्वेने प्रवास करण्यास १० ते १२ तास लागतात. मुंबईहून गोव्याला जाणाऱ्या प्रमुख रेल्वे म्हणजे तेजस एक्सप्रेस, कोकण कन्या, जन शताब्दी एक्सप्रेस. या  दररोज धावतात. ऑक्टोबर ते मार्च आणि जून ते ऑगस्ट हे महिने प्रवासासाठी योग्य मानले जातात. सकाळच्या सूर्यकिरण शेतांवर आणि तलावांवर पडतात आणि रेल्वे बोगद्यातून बाहेर पडून समुद्राचे दृश्य दाखवते तेव्हा जगात यापेक्षा सुंदर काहीही नाही असे वाटते.