Kerala CM: दिल्लीत खलबतं, राहुल-खर्गे बैठक संपली; केरळचा पुढचा मुख्यमंत्री कोण?

केरळच्या मुख्यमंत्रिपदाचा सस्पेन्स वाढला आहे. दिल्लीत काँग्रेस अध्यक्ष मल्लिकार्जुन खर्गे आणि राहुल गांधी यांच्यातली महत्त्वाची बैठक संपली आहे. ही बैठक तब्बल पाऊण तास चालली. लवकरच मुख्यमंत्र्यांच्या नावाची घोषणा होण्याची शक्यता आहे.

दिल्ली: केरळचे नवे मुख्यमंत्री कोण असतील, यावर आता लवकरच शिक्कामोर्तब होणार आहे. दिल्लीत काँग्रेस अध्यक्ष मल्लिकार्जुन खर्गे यांच्या राजाजी रोडवरील घरी राहुल गांधींसोबत झालेली महत्त्वाची बैठक संपली आहे. ही बैठक जवळपास पाऊण तास चालली. चर्चेनंतर राहुल गांधी खर्गे यांच्या घरातून बाहेर पडले आहेत. मात्र, मुख्यमंत्र्यांच्या नावाची घोषणा करण्यासाठी कोणतीही पत्रकार परिषद बोलावण्यात आलेली नाही. त्यामुळे के.सी. वेणुगोपाल, व्ही.डी. सतीशन आणि रमेश चेन्नीथला यांच्या गटांमध्ये सध्या धाकधूक वाढली आहे.

संपूर्ण केरळ मोठ्या उत्सुकतेने मुख्यमंत्र्यांच्या घोषणेची वाट पाहत आहे. के.सी. वेणुगोपाल, व्ही.डी. सतीशन आणि रमेश चेन्नीथला या नावांची जोरदार चर्चा सुरू आहे. हायकमांड कोणाच्या नावावर शिक्कामोर्तब करतं याकडे संपूर्ण राजकीय वर्तुळाचं लक्ष लागलं आहे. व्ही.डी. सतीशन आणि रमेश चेन्नीथला यांच्या घराबाहेर अनेक कार्यकर्त्यांनी गर्दी केली आहे. राहुल-खर्गे बैठकीनंतर निर्णयाची माहिती के.सी. वेणुगोपाल यांना दिली जाईल, असं कळतंय. केरळच्या प्रभारी AICC सरचिटणीस दीपा दास मुन्शी या अर्ध्या तासात तिरुवनंतपुरमला पोहोचतील. तिथे त्या आमदारांची बैठक घेतील अशी माहिती आहे.

निवडणुकीचा निकाल लागून दहा दिवस झाले तरी केरळला अजून मुख्यमंत्री मिळालेला नाही. यामुळे राज्याचा कारभार अक्षरशः ठप्प झाला आहे. केरळसोबत निकाल लागलेल्या इतर सर्व राज्यांमध्ये नवीन सरकारांनी कामही सुरू केलं आहे. आज संध्याकाळी मल्लिकार्जुन खर्गे यांच्याशी चर्चा करून राहुल गांधी अंतिम निर्णय घेतील, असं काँग्रेसच्या सूत्रांनी सांगितलं आहे. 'चर्चा पूर्ण झाली असून आजच घोषणा अपेक्षित आहे,' अशी प्रतिक्रिया केपीसीसी अध्यक्ष सनी जोसेफ यांनी दिली आहे.