कर्नाटकात खासगी स्लिपर कोच बस आगीच्या भक्ष्यस्थानी, 10 प्रवाशांचा झोपेतच होरपळून मृत्यू!

Karnataka Bus Fire Accident on NH48 : कर्नाटकातील चित्रदुर्ग येथे NH-48 वर पहाटे ३ वाजता एका स्लीपर बसची ट्रकला धडक बसून आग लागली. बंगळूरहून शिवमोग्गाकडे जाणाऱ्या बसमधील झोपलेले प्रवासी जिवंत जळाले. 

Karnataka Bus Fire Accident on NH48 : कर्नाटकातील चित्रदुर्ग जिल्ह्यात गुरुवारी पहाटे एक भीषण रस्ता अपघात झाला. बंगळूरहून शिवमोग्गाकडे जाणाऱ्या एका खासगी स्लीपर बसला अचानक आग लागली. हा अपघात राष्ट्रीय महामार्ग-48 (NH-48) वर झाला, जेव्हा बस ३०० किलोमीटरपेक्षा जास्त लांबच्या प्रवासावर होती. प्राथमिक माहितीनुसार, समोरून येणारा एक भरधाव ट्रक दुभाजक ओलांडून दुसऱ्या लेनमध्ये घुसला आणि थेट बसला धडकला. ही धडक इतकी जोरदार होती की काही सेकंदातच बस जणू जळते सरण बनली.

पहाटे ३ वाजताची वेळ सर्वात धोकादायक?

हा अपघात गुरुवारी पहाटे ३ वाजण्याच्या सुमारास झाला, जेव्हा बसमधील बहुतेक प्रवासी गाढ झोपेत होते. अचानक झालेली धडक आणि त्यानंतर लागलेल्या आगीमुळे प्रवाशांना सावरण्याची संधीच मिळाली नाही. झोपेत असलेल्या लोकांना काही कळण्याआधीच बसमध्ये धूर आणि आग पसरली होती. यामुळेच अनेक जण बाहेर पडू शकले नाहीत.

धडकेनंतर बसला आग कशी लागली?

प्रत्यक्षदर्शींच्या म्हणण्यानुसार, ट्रकला धडकल्यानंतर बसच्या पुढील भागात मोठा स्फोट झाला. त्यानंतर लगेचच सीबर्ड कोचची ही स्लीपर बस आगीच्या भक्ष्यस्थानी सापडली. आग इतकी भीषण होती की काही मिनिटांतच संपूर्ण बस जळू लागली. बसमधील पडदे, गाद्या आणि प्लास्टिकच्या वस्तूंमुळे आग आणखी भडकली.

किती जण वाचले आणि किती जणांचा मृत्यू?

आतापर्यंत मिळालेल्या माहितीनुसार, या अपघातात किमान १० प्रवाशांचा जिवंत जळून मृत्यू झाला आहे. तथापि, ९ जण कोणत्याही गंभीर दुखापतीशिवाय बाहेर पडण्यात यशस्वी झाले. प्रशासनाच्या म्हणण्यानुसार, काही प्रवासी अजूनही बसमध्ये अडकलेले असू शकतात, त्यामुळे मृतांचा आकडा १७ पर्यंत वाढण्याची शक्यता वर्तवण्यात येत आहे.

यापूर्वीही असे अपघात झाले का?

आश्चर्याची गोष्ट म्हणजे नोव्हेंबरमध्ये तेलंगणामध्येही असाच एक भीषण अपघात झाला होता. तेथे हैदराबाद-विजापूर महामार्गावर एका प्रवासी बसची खडीने भरलेल्या ट्रकशी धडक झाली होती. त्या अपघातात २० जणांचा मृत्यू झाला होता. ट्रकवरील खडी बसमध्ये पडल्याने अनेक प्रवासी त्याखाली दबले गेले होते. तेलंगणा राज्य मार्ग परिवहन महामंडळाच्या त्या बसमध्ये सुमारे ७० प्रवासी होते.

महामार्गांवरील सुरक्षा पुन्हा एकदा चर्चेत?

सतत होणाऱ्या अशा अपघातांमुळे राष्ट्रीय महामार्गावरील अवजड वाहनांची सुरक्षा, चालकांचा निष्काळजीपणा आणि बसमधील अग्निसुरक्षेवर गंभीर प्रश्न निर्माण झाले आहेत. रात्रीच्या वेळी भरधाव ट्रक, कमकुवत दुभाजक आणि बसमधील आग प्रतिबंधक साधनांची मर्यादित व्यवस्था, ही सर्व अपघातांची प्रमुख कारणे बनत आहेत. कर्नाटकातील हा बस अपघात केवळ एक दुर्घटना नाही, तर एक धोक्याची सूचना आहे. झोप, वेग आणि निष्काळजीपणा यांचा संगम क्षणात अनेकांचे प्राण कसे घेऊ शकतो, याचे हे एक दुःखद उदाहरण आहे.