ITR Filing : करदात्यांसाठी मोठी बातमी; आयटीआर फायलिंगला मुदतवाढ, 16 सप्टेंबरपर्यंत येणार भरता

ITR Filing : आयकर विभागाने आयटीआर दाखल करण्याची अंतिम तारीख 15 सप्टेंबरऐवजी 16 सप्टेंबर 2025 पर्यंत वाढवली आहे. ई-फायलिंग पोर्टलवरील प्रचंड ट्रॅफिक व तांत्रिक अडचणींमुळे हा निर्णय घेण्यात आला.

मुंबई : करदात्यांसाठी दिलासादायक बातमी समोर आली आहे. आयकर विभागाने आयटीआर दाखल (ITR Filing) करण्याची तारीख आणखी एक दिवस वाढवली आहे. केंद्रीय प्रत्यक्ष कर मंडळाने (CBDT) 2025-2026 साठी आयकर विवरणपत्र भरण्याची अंतिम तारीख 15 सप्टेंबर 2025 वरून 16 सप्टेंबर 2025 पर्यंत वाढवण्याचा निर्णय घेतला आहे.

वेबसाइटवरील तांत्रिक अडचणीमुळे निर्णय

15 सप्टेंबर ही आयटीआर दाखल करण्याची शेवटची तारीख होती, मात्र त्या दिवशी लाखो वापरकर्त्यांना आयकर विभागाच्या ई-फायलिंग पोर्टलवर प्रचंड ट्रॅफिक आणि तांत्रिक समस्यांना सामोरे जावे लागले. या पार्श्वभूमीवर CBDT ने अंतिम मुदत आणखी एक दिवस वाढवण्याचा निर्णय घेतला आहे. सोशल मीडिया प्लॅटफॉर्म X वरून विभागाने ही माहिती जाहीर केली.

7.3 कोटींहून अधिक आयटीआर दाखल

आयकर विभागाने दिलेल्या माहितीनुसार, 15 सप्टेंबरपर्यंत 7.3 कोटींहून अधिक आयटीआर दाखल करण्यात आले आहेत. हा आकडा गेल्या वर्षीच्या 7.28 कोटींपेक्षा जास्त आहे. यावरून कर अनुपालनामध्ये वाढ होत असल्याचे दिसून येते. दरम्यान, अनेक करदाते आणि चार्टर्ड अकाउंटंटनी सोशल मीडियावर तक्रार केली की पोर्टलवर लॉग इन करणे, आयटीआर अपलोड करणे, आगाऊ कर भरणे आणि AIS डाउनलोड करण्यात अडचणी येत आहेत.

विभागाची स्पष्टीकरणे व सुविधा

विभागाने स्पष्ट केले की पोर्टल "योग्यरित्या काम करत आहे." तसेच, वापरकर्त्यांना ब्राउझर कॅशे साफ करण्याचा किंवा दुसरा ब्राउझर वापरण्याचा सल्ला देण्यात आला. वैयक्तिक अडचणी सोडवण्यासाठी विभागाने ईमेल आयडीवर पॅन आणि मोबाईल नंबर पाठवण्याचा पर्याय उपलब्ध करून दिला आहे.

यापूर्वीही वाढवली होती तारीख

मे 2025 मध्ये, आयकर विभागाने आयटीआर फॉर्ममध्ये स्ट्रक्चरल व कंटेंटमधील बदल लक्षात घेऊन शेवटची तारीख 31 जुलै वरून 15 सप्टेंबरपर्यंत वाढवली होती. आता पोर्टलच्या तांत्रिक अडचणींमुळे अंतिम मुदत पुन्हा एक दिवस वाढवून 16 सप्टेंबर करण्यात आली आहे.

आयटीआर वेळेवर का भरावा?

वेळेवर आयटीआर भरल्यास दंड टाळता येतो आणि परतफेड प्रक्रिया लवकर पूर्ण होते. शिवाय, हे तुमचा आर्थिक रेकॉर्ड मजबूत करतं, जे कर्ज, व्हिसा आणि इतर आर्थिक व्यवहारांमध्ये महत्त्वाची भूमिका बजावते.