४८ तासांत देश सोडा, अन्यथा कठोर कारवाई, फडणवीसांचा महाराष्ट्रातील पाकिस्तानींना इशारा

महाराष्ट्र, कर्नाटक, बिहार आणि ओडिशाने हकालपट्टीची प्रक्रिया वेगवान केली आहे. कोणत्या राज्यात किती पाकिस्तानी नागरिकांना परतण्याचे निर्देश दिले आहेत ते जाणून घ्या. 

मुंबई ः जम्मू-काश्मीरमधील पहलगाम येथे झालेल्या भीषण दहशतवादी हल्ल्यानंतर भारत आणि पाकिस्तानमधील तणाव वाढला आहे. २२ एप्रिल रोजी झालेल्या या हल्ल्यात दहशतवाद्यांनी २६ पर्यटकांना ठार मारले. त्यानंतर केंद्र सरकारने मोठा निर्णय घेत २७ एप्रिलपासून पाकिस्तानी नागरिकांचे सर्व व्हिसा रद्द केले आहेत. फक्त वैद्यकीय व्हिसाला २९ एप्रिलपर्यंत वैध ठेवण्यात आले आहे. दरम्यान, मुख्यमंत्री देवेंद्र फडणवीस यांनी पाकिस्तानी नागरिकांना कठोर कारवाईचा इशारा दिला आहे. देशाच्या सुरक्षेसाठी कठोर निर्णय घ्यावे लागतात. पाकिस्तानी नागरिकांनी ४८ तासांत देश सोडला नाही तर कठोर कारवाई केली जाणार आहे. फडणवीस यांनी शनिवारी पुण्यातील मृत पर्यटकांचा घरी जाऊन त्यांच्या कुटुंबीयांची भेट घेतली.

महाराष्ट्र: ५५ पाकिस्तानी नागरिकांना भारत सोडण्याचे आदेश

महाराष्ट्रात ५५ पाकिस्तानी नागरिकांना २७ एप्रिलपर्यंत भारत सोडण्याची नोटीस देण्यात आली आहे. राज्य गृह विभागाच्या अधिकाऱ्यांच्या म्हणण्यानुसार, नागपुरात १८, ठाण्यात १९, जळगावात १२ आणि पुण्यात तीन पाकिस्तानी नागरिक अधिकृतपणे राहत आहेत. नवी मुंबई, मुंबई आणि रायगडमध्ये प्रत्येकी एक पाकिस्तानी नागरिक आहे. सर्व पोलीस आयुक्तांना आणि अधीक्षकांनी त्यांना देश सोडण्याचे निर्देश दिले आहेत. नाशिकमध्येही सहा पाकिस्तानी महिला राहत आहेत, पण तिथे अद्याप अधिकृत आदेश पोहोचलेले नाहीत. नाशिकचे जिल्हाधिकारी जलज शर्मा म्हणाले की, प्रशासन सतर्क आहे आणि आवश्यक माहिती गोळा केली जात आहे. महाराष्ट्र सरकारच्या आकडेवारीनुसार राज्यात एकूण ५,०३७ पाकिस्तानी नागरिक राहतात, त्यापैकी १०७ बेपत्ता आहेत आणि ३४ बेकायदेशीरपणे राहत आहेत.

कर्नाटक: विद्यार्थ्यांसह पाकिस्तानी नागरिकांना परतण्याचे निर्देश

कर्नाटकात गृहमंत्री जी. परमेश्वर यांनी सांगितले की, राज्य सरकारने पाकिस्तानी नागरिकांची ओळख पटवण्यास सुरुवात केली आहे. त्यांनी सांगितले की, जे लोक पर्यटक व्हिसा किंवा इतर अल्पकालीन व्हिसावर आहेत त्यांना ताबडतोब देश सोडण्याचे निर्देश देण्यात आले आहेत.

कलबुर्गीचे पोलीस आयुक्त शरणप्पा एसडी यांनी सांगितले की, शहरात नऊ पाकिस्तानी नागरिक राहत होते, त्यापैकी सहा जणांना देश सोडण्याचे आदेश देण्यात आले आहेत. विद्यार्थ्यांनाही या आदेशानुसार देश सोडण्यास सांगण्यात आले आहे कारण त्यांना कोणतीही सूट देण्यात आलेली नाही.

बिहार: उपमुख्यमंत्री सम्राट चौधरी यांचे विधान

बिहारमध्ये उपमुख्यमंत्री सम्राट चौधरी म्हणाले की, राज्य सरकार पाकिस्तानी नागरिकांची ओळख पटवून त्यांना परत पाठवेल. केंद्र सरकारच्या निर्देशांचे पालन करून आम्ही कारवाई करत आहोत, असे ते म्हणाले. कोणत्याही परिस्थितीत पाकिस्तानी नागरिकांना परतावे लागेल. पटना पोलिसांनी दिलेल्या माहितीनुसार, शहरात राहणाऱ्या सर्व पाकिस्तानी महिला दीर्घकालीन व्हिसावर आहेत. तीन महिलांनी भारतीय नागरिकत्वासाठी अर्ज केला आहे आणि एका महिलेचा पटनामध्ये खटला सुरू आहे.

ओडिशा: १२ पाकिस्तानी नागरिकांची ओळख

ओडिशामध्येही हकालपट्टीची प्रक्रिया वेगवान करण्यात आली आहे. राज्याचे पोलीस महासंचालक वाय. बी. खुराण्या म्हणाले की, विविध जिल्ह्यांमध्ये १२ पाकिस्तानी नागरिकांची ओळख पटवण्यात आली आहे आणि नोटीस मिळाल्यानंतर ४८ तासांत त्यांना देश सोडण्याचे निर्देश देण्यात आले आहेत. ओडिशाचे कायदामंत्री पृथ्वीराज हरिचंदन यांनी असेही सांगितले की, लवकरच राज्यात राहणाऱ्या बांगलादेशी घुसखोरांविरुद्धही कारवाई सुरू केली जाईल. आतापर्यंत ३,७३८ बांगलादेशी घुसखोरांची ओळख पटवण्यात आली आहे.

केंद्राने सर्व राज्यांना दिले कडक निर्देश

केंद्रीय गृहमंत्री अमित शाह यांनी स्वतः राज्यांच्या मुख्यमंत्र्यांशी बोलून त्वरित कारवाई करण्यास सांगितले आहे. पहलगाम दहशतवादी हल्ल्यानंतर देशभरातील सुरक्षा यंत्रणा सतर्क झाल्या आहेत आणि पाकिस्तानी नागरिकांचे व्हिसा रद्द करण्यात आले आहेत.