Gurugram Dog Rescue: हा कुत्रा १२व्या मजल्यावर पोहोचलाच कसा? गुरुग्राममधील थरारक बचावकार्याचा VIDEO VIRAL

गुरुग्राममध्ये एका पडक्या इमारतीच्या १२व्या मजल्यावर एक भटका कुत्रा अडकला होता. अग्निशमन दलाच्या जवानांनी ३० मिनिटांत या कुत्र्याची सुखरूप सुटका केली. पण हा कुत्रा इतक्या उंचीवर पोहोचला कसा, हे एक गूढच आहे.

गुरुग्राममधील सोहना रोडवर असलेल्या सुभाष चौकाजवळ एक विचित्र घटना घडली. बुधवारी सकाळी एका पडक्या इमारतीच्या १२व्या मजल्यावरील छताच्या कडेला एक भटका कुत्रा अडकलेला दिसला. एवढ्या उंचीवर हा प्राणी पोहोचलाच कसा, हे पाहून लोकांना आश्चर्य वाटलं.

एका व्यक्तीने या कुत्र्याला पाहिलं आणि लगेच ११२ या इमर्जन्सी नंबरवर फोन केला. माहिती मिळताच, हरियाणा अग्निशमन दलाची गाडी जवळपास ३० मिनिटांत घटनास्थळी पोहोचली. त्यांच्यासोबत एक पीसीआर व्हॅनही मदतीसाठी आली होती.

सुटकेवेळी कुत्रा सतत शेपटी हलवत होता

अग्निशमन दलाच्या जवानांनी मोठ्या कौशल्याने बचावकार्य पूर्ण केलं आणि कुत्र्याला सुखरूप खाली उतरवलं. विशेष म्हणजे, या संपूर्ण घटनेदरम्यान कुत्रा सतत आपली शेपटी हलवत होता. जणू काही सुटका झाल्याचा आनंदच तो व्यक्त करत होता.

या बचावकार्याचा व्हिडिओ सोशल मीडियावर व्हायरल झाला आहे. नेटकऱ्यांनी अग्निशमन दलाच्या कामाचं कौतुक केलं आहे. या घटनेमुळे आपत्कालीन परिस्थितीत तातडीने मदत मिळण्याचं महत्त्व पुन्हा एकदा अधोरेखित झालं आहे.

या घटनेत कुत्र्याला कोणतीही इजा झाली नाही. सुटकेनंतर त्याला पुन्हा त्याच परिसरात सोडून देण्यात आलं.