Gold Price Crash : सोन्याचे भाव ४,००० डॉलरच्या खाली, चीनच्या बाजारात खरेदीसाठी लोकांची झुंबड
सार
जागतिक बाजारात सोन्याचे भाव प्रति औंस ४,००० डॉलरच्या खाली आल्याने चीनच्या शेनझेन शहरातील शुईबेई ज्वेलरी मार्केटमध्ये खरेदीसाठी मोठी झुंबड उडाली आहे. स्वस्त सोनं खरेदी करण्यासाठी लोकांनी बाजारात अशी गर्दी केलीय की जणू एखाद्या भाजी मंडईतच आलोय असं वाटेल.
मुंबई : जागतिक पातळीवर सोन्याच्या किमतीत मोठी घसरण झाल्यामुळे चीनमधील एका प्रसिद्ध ज्वेलरी मार्केटमध्ये लोकांची तुफान गर्दी पाहायला मिळत आहे. सोशल मीडियावर सध्या काही व्हिडिओ व्हायरल होत आहेत. यात शेनझेनच्या प्रसिद्ध शुईबेई गोल्ड मार्केटमध्ये लोकांची मोठी झुंबड उडालेली दिसत आहे. स्वस्त सोनं खरेदी करण्यासाठी लोक दुकानांच्या छोट्या गल्ल्यांमध्येही अक्षरशः खचाखच भरले आहेत.
बाजारातली ही गर्दी पाहून अनेकांना आश्चर्याचा धक्का बसलाय. सोशल मीडियावर लोक या गर्दीची तुलना आपल्याकडच्या दादर किंवा पुण्याच्या तुडुंब भरलेल्या भाजी मंडईशी करत आहेत. जागतिक सोन्याचे भाव प्रति औंस ४,००० डॉलरच्या खाली आल्याने, जे ग्राहक भाव कमी होण्याची वाट पाहत होते, ते आता थेट दागिन्यांच्या दुकानात धाव घेत आहेत.
वीकेंडच्या सुट्टीत शेनझेनच्या शुईबेई ज्वेलरी मार्केटमध्ये लोकांनी मोठी गर्दी केली. कमी झालेल्या दरात सोन्याचे दागिने आणि गुंतवणुकीचे पर्याय शोधण्यासाठी ग्राहकांनी बाजारात एकच गर्दी केली होती.
चीनच्या सोशल मीडियावर या गर्दीचे अनेक फोटो आणि व्हिडिओ शेअर केले जात आहेत. यात दुकानांच्या गल्ल्यांमध्ये लोक एकमेकांना धक्के मारत हळूहळू पुढे सरकताना दिसत आहेत.
मी गेली काही वर्षे शुईबेईचे व्हिडिओ पोस्ट करत आहे, पण वीकेंडला एवढी गर्दी मी कधीच पाहिली नाही. चिनी मीडियातील वृत्तांनुसार, बाजारात इतकी गर्दी आहे की कर्मचाऱ्यांना जेवायलाही वेळ मिळत नाहीये.
किमती कमी झाल्यामुळे ज्यांना लग्नासारख्या कारणांसाठी सोन्याची नितांत गरज आहे, ते लोक या घसरणीचा फायदा घेत खरेदीसाठी बाहेर पडत आहेत.— David Lee (@DavidLe76335983) २५ ऑक्टोबर २०२६
चिनी मीडियाच्या हवाल्याने आलेल्या बातम्यांनुसार, बाजारात नेहमीपेक्षा खूप जास्त गर्दी होती. सोनं खरेदी करण्यासाठी लोकांची ही धडपड पाहून तिथे आलेल्या अनेक पर्यटकांनीही आश्चर्य व्यक्त केलं.
जागतिक बाजारात सोन्याच्या किमतीत सतत चढ-उतार होत असले तरी, चिनी ग्राहकांचं सोन्यावरचं प्रेम या फोटोंमधून स्पष्ट दिसत आहे. सोशल मीडियावर सध्या हाच चर्चेचा विषय बनलाय. अर्थात, बाजारात एवढी गर्दी असली तरी प्रत्येकाने सोनं खरेदी केलंच असेल असं नाही. काही ग्राहक फक्त भाव तपासायला आले असतील, तर काही जण भाव आणखी कमी होण्याची वाट पाहत असतील.
सोन्याचे भाव प्रति औंस ४,००० डॉलरच्या खाली
जागतिक सराफा बाजारात सोन्याच्या किमतीत मोठी घसरण झाल्यानंतर ही गर्दी उसळली. २३ ऑक्टोबर रोजी, स्पॉट गोल्डने प्रति औंस ४,००० डॉलरची महत्त्वाची पातळी ओलांडून खाली घसरण नोंदवली. सोन्याचा भाव ०.७२ टक्क्यांनी घसरून ३,९९५.६३ डॉलरवर बंद झाला. याशिवाय, सोन्याच्या दरात आठवडाभरात सुमारे ४ टक्क्यांची घसरण झाली आहे. जून महिन्यानंतरची ही सर्वात मोठी साप्ताहिक घसरण मानली जात आहे.
सोन्याचे भाव वाढल्यामुळे ज्या ग्राहकांनी दागिन्यांची खरेदी पुढे ढकलली होती, त्यांनी आता भाव कमी होताच बाजारात धाव घेतली आहे. अनेकांसाठी ही घसरण म्हणजे कमी पैशात दागिने किंवा सोनं खरेदी करण्याची एक सुवर्णसंधीच ठरली आहे.
सोन्याचे भाव का घसरत आहेत?
सोन्याच्या किमतीत सध्या होत असलेल्या घसरणीमागे अनेक जागतिक आर्थिक कारणं आहेत. वाढती महागाई, ऊर्जेच्या वाढत्या किमती आणि अमेरिकेतील व्याजदरांबाबतची अनिश्चितता यामुळे गुंतवणूकदारांच्या मानसिकतेवर परिणाम झाला आहे. सोन्यातून कोणतंही व्याज मिळत नसल्याने, जर व्याजदर जास्त राहिले तर काही गुंतवणूकदारांना सोनं कमी आकर्षक वाटू शकतं. जेव्हा गुंतवणूकदार पैसे उभे करण्यासाठी किंवा इतर ठिकाणचं नुकसान भरून काढण्यासाठी मालमत्ता विकतात, तेव्हा शेअर बाजारातील विक्रीच्या दबावाचा परिणाम सोन्याच्या किमतींवरही होऊ शकतो. असं असलं तरी, जे लोक सोन्याकडे दीर्घकालीन गुंतवणुकीचा सुरक्षित पर्याय म्हणून पाहतात, ते आजही सोनं खरेदीलाच पसंती देत आहेत.