Ram Statue : गोव्यातील भव्य राम मूर्तीने रचला इतिहास, इंडिया आणि आशिया बुक ऑफ रेकॉर्ड्समध्ये नोंद

गोव्यातील पर्तगाळी येथील श्री संस्थान गोकर्ण मठातील भगवान श्रीरामाच्या भव्य कांस्य मूर्तीची इंडिया बुक ऑफ रेकॉर्ड्स आणि आशिया बुक ऑफ रेकॉर्ड्समध्ये नोंद झाली आहे. अशा प्रकारची ही सर्वात उंच मूर्ती ठरली आहे.

मुंबई : गोवा आणि परिसरासाठी ही एक मोठी अभिमानाची गोष्ट आहे. काणकोणमधील पर्तगाळी येथील श्री संस्थान गोकर्ण पर्तगाळी जीवोत्तम मठाच्या आदर्श धाममध्ये उभारण्यात आलेल्या मर्यादा पुरुषोत्तम श्रीरामाच्या भव्य कांस्य मूर्तीने एक नवा विक्रम केला आहे. या मूर्तीला आता अधिकृतपणे इंडिया बुक ऑफ रेकॉर्ड्स आणि आशिया बुक ऑफ रेकॉर्ड्सने भगवान श्रीरामाची सर्वात उंच कांस्य मूर्ती म्हणून मान्यता दिली आहे.

श्री विद्याधिराज तीर्थ यांच्या ८२ व्या वाढदिवसानिमित्त आयोजित एका विशेष कार्यक्रमात हे रेकॉर्ड्स जाहीर करण्यात आले. दोन्ही रेकॉर्ड बुक्सच्या अधिकृत परीक्षक (adjudicator) डॉ. चित्रा जैन यांनी श्री विद्याधीश तीर्थ श्रीपाद वडेर स्वामीजी यांच्याकडे ही प्रमाणपत्रं सोपवली.

२८ नोव्हेंबर २०२५ रोजी मूर्तीचं उद्घाटन

पायथ्यापासून ७८.७४ फूट (२४ मीटर) उंच असलेली ही भव्य मूर्ती श्री विद्याधीश तीर्थ श्रीपाद वडेर स्वामीजी यांच्या मार्गदर्शनाखाली तयार करण्यात आली आहे. मिळालेल्या माहितीनुसार, पंतप्रधान नरेंद्र मोदी यांनी २८ नोव्हेंबर २०२५ रोजी या मूर्तीचे उद्घाटन केले होते. प्रसिद्ध शिल्पकार, दिवंगत पद्मभूषण पुरस्कार विजेते राम सुतार आणि त्यांचे पुत्र अनिल सुतार यांनी ही उत्कृष्ट मूर्ती साकारली आहे.

या सोहळ्यादरम्यान, रामचंद्र पद्मनाभ भट गावकर यांना विठ्ठल मास्टर गौरव पुरस्कार प्रदान करण्यात आला. याशिवाय, विविध ठिकाणी उत्कृष्ट शैक्षणिक कामगिरी करणाऱ्या विद्यार्थ्यांचाही सत्कार करण्यात आला.

या कार्यक्रमाला मठाच्या केंद्रीय समितीचे अध्यक्ष श्रीनिवास डेम्पो, गोव्याचे सार्वजनिक बांधकाम मंत्री दिगंबर कामत आणि चातुर्मास्य समितीचे अध्यक्ष अनिल पै यांच्यासह अनेक महत्त्वाचे लोक उपस्थित होते.