Goa Budget: पायाभूत सुविधा, मनुष्यबळावर भर; मुख्यमंत्री मांडणार गोव्याचे बजेट

Goa Budget 2026 27 CM Pramod Sawant to Focus on Infrastructure and Human Resources: गोव्याचे मुख्यमंत्री प्रमोद सावंत शुक्रवारी राज्याचा २०२६-२७ चा अर्थसंकल्प सादर करणार आहेत. गोव्याच्या लोकांचं सर्वांगीण हित साधणं हे या बजेटचं उद्दिष्ट असेल.

गोव्याचे मुख्यमंत्री प्रमोद सावंत शुक्रवारी २०२६-२०२७ या वर्षासाठीचा अर्थसंकल्प सादर करणार आहेत. गोवा विधानसभेच्या अर्थसंकल्पीय अधिवेशनाच्या पहिल्याच दिवशी ते हे बजेट मांडतील. विशेष म्हणजे, मुख्यमंत्री म्हणून सावंत सातव्यांदा अर्थसंकल्प सादर करत आहेत. शुक्रवारी दुपारी ३:३० वाजता बजेट मांडायला सुरुवात होईल आणि ते साधारण दोन तास चालेल. 'या बजेटमध्ये आम्ही मनुष्यबळ विकास (Human Resource development) आणि पायाभूत सुविधांच्या विकासासाठी (infrastructure development) अनेक गोष्टी करणार आहोत,' असं सावंत यांनी सांगितलं.

ANI वृत्तसंस्थेशी बोलताना सावंत म्हणाले, "आजपासून गोवा विधानसभेचं अर्थसंकल्पीय अधिवेशन सुरू होत आहे. अधिवेशनाच्या पहिल्याच दिवशी मी राज्याचा अर्थसंकल्प सादर करणार आहे. ही माझी सातवी वेळ आहे. राज्यातील जनतेच्या विकासासाठी आणि कल्याणासाठी या बजेटमध्ये अनेक महत्त्वाच्या गोष्टी आहेत."

बजेटपूर्वी विविध घटकांशी चर्चा

अर्थसंकल्प सादर करण्यापूर्वी, २८ फेब्रुवारी रोजी मुख्यमंत्री सावंत यांनी विविध क्षेत्रातील प्रतिनिधी आणि औद्योगिक संस्थांसोबत बैठका घेतल्या होत्या.

मिळालेल्या माहितीनुसार, मुख्यमंत्री सावंत यांनी सोलर असोसिएशन, बार्ज ओनर्स असोसिएशन, सीए आणि सीएस असोसिएशन, गोवा युनियन ऑफ जर्नालिस्ट्स, GCCI, LUB, वेर्णा इंडस्ट्रीज, GSIA, BNI, गोवा फार्मा असोसिएशन, GTA आणि ASSOCHAM च्या प्रतिनिधींशी संवाद साधला. याचबरोबर TTAG, लिकर, रेस्टॉरंट, काजू आणि इव्हेंट मॅनेजमेंट असोसिएशन तसेच CREDAI, पेट्रोल पंप आणि खाणकाम संघटनांच्या प्रतिनिधींशीही त्यांनी चर्चा केली.

या बैठकांमध्ये व्यवसायातील सुलभता , पर्यटनाला चालना, MSMEs ना पाठिंबा, हरित ऊर्जेला प्रोत्साहन आणि रोजगार निर्मितीसाठी अनेक महत्त्वाच्या सूचना आल्याचं सावंत यांनी सांगितलं.

हे सरकार सर्वांना सोबत घेऊन चालणारं, विकासाला चालना देणारं आणि लोकाभिमुख बजेट सादर करण्यासाठी कटिबद्ध आहे. यातून गोव्याच्या आर्थिक विकासाला गती मिळेल आणि सर्वसमावेशक प्रगती साधली जाईल, असा विश्वास मुख्यमंत्र्यांनी व्यक्त केला.

मुख्यमंत्र्यांच्या हस्ते नियुक्तीपत्रांचे वाटप

याआधी, २१ फेब्रुवारी रोजी मुख्यमंत्र्यांनी स्वातंत्र्यसैनिकांच्या मुलांना आणि असिस्टंट स्टेट टॅक्स ऑफिसर व स्टेट टॅक्स इन्स्पेक्टर पदांसाठी निवड झालेल्या उमेदवारांना नियुक्तीपत्रं दिली होती.