साडीतील देखण्या जर्मन तरुणीनं लावलं भारतीयांना वेड, बनली नवी नॅशनल क्रश [Video]

German Woman in Saree Becomes New National Crush : बंगळुरूच्या रस्त्यावर एका स्ट्रीट फोटोग्राफरने साडी नेसलेल्या लिझ नावाच्या जर्मन तरुणीचे फोटो काढले आहेत. हे फोटो आणि व्हिडिओ इंस्टाग्रामवर व्हायरल झाले आहेत.

German Woman in Saree Becomes New National Crush : काही स्ट्रीट फोटोग्राफर सुंदर मुलींचे फोटो काढून त्यांच्या परवानगीने सोशल मीडियावर पोस्ट करतात. रस्त्यावर होणाऱ्या या इन्स्टंट फोटोग्राफीचे अनेक चाहते असतात. अशाप्रकारे, रस्त्यावरील फोटोग्राफरच्या कॅमेऱ्यात पोझ देणाऱ्या अनेक मुली खूप प्रसिद्ध झाल्या आहेत. रस्त्यावर अनोळखी लोकांशी बोलून ओळख निर्माण करणारे फोटोग्राफर त्यांना गर्दीच्या रस्त्यावर थांबवून सुंदर पोझ देण्यास सांगतात. कॅमेरा पाहताच तरुणी रस्त्यावरच जबरदस्त पोझ देतात. असाच एका स्ट्रीट फोटोग्राफरच्या कॅमेऱ्यात एक जर्मन तरुणी कैद झाली आहे, जी आता खूप व्हायरल झाली आहे.

rakesh.photopedia नावाचे इंस्टाग्राम खाते असलेल्या राकेश नाईक सीके यांनी या जर्मन तरुणीचे फोटो काढले आहेत. लिझ नावाची ही जर्मन महिला बंगळुरूच्या रस्त्यावरून जात असताना राकेशने तिची ओळख करून घेतली आणि 'तुम्ही खूप सुंदर दिसत आहात, फोटोसाठी पोझ द्याल का?' असे विचारले. यावर त्या जर्मन महिलेने आनंदाने फोटोसाठी पोझ दिली आणि लिझचे फोटो व व्हिडिओ खूप व्हायरल झाले आहेत. व्हिडिओ पाहणारे नेटकरी 'ही नवीन नॅशनल क्रश आहे' अशा कमेंट्स करत आहेत.

स्लीव्हलेस ब्लाउजसोबत लाल, निळ्या आणि सोनेरी रंगाची बॉर्डर असलेली क्रीम रंगाची साडी नेसलेली ही महिला जर्मनीहून बंगळुरूला फिरायला आली आहे. 'मी यापूर्वी तीन महिने बंगळुरूमध्ये राहिले होते. मला बंगळुरू खूप आवडले, म्हणून मी पुन्हा येथे आले आहे,' असे तिने फोटोग्राफरला सांगितले. हा व्हिडिओ आणि फोटो प्रचंड व्हायरल झाले असून, अनेकजण या जर्मन सुंदरीच्या सौंदर्यावर फिदा झाले आहेत.

‘तुम्ही साडीत खूप सुंदर दिसत आहात. मी एक स्ट्रीट फोटोग्राफर आहे आणि मी अनोळखी लोकांचे फोटो काढतो. तुम्हाला हरकत नसेल तर मी तुमचे फोटो काढू का?’ असे फोटोग्राफरने विचारताच लिझने धन्यवाद म्हटले आणि ‘कधी?’ असे विचारले. ‘आत्ताच’ असे म्हणताच तिने लगेच आपल्या साडीकडे एकदा पाहून आनंदाने तयारी दर्शवली. यावेळी, ‘भारतातील तुमचे आवडते गाणे कोणते?’ असे विचारल्यावर तिने ‘सीधी साधी छोरी शराबी हो गयी’ हे गाणे आवडत असल्याचे सांगितले. तसेच, ‘मी पहिल्यांदा येथे आले तेव्हा होळीचा सण होता. त्यावेळी हे गाणे वाजवले जात होते. मला हे गाणे खूप आवडले,’ असेही तिने सांगितले. हे गाणे रणबीर कपूर आणि दीपिका पदुकोण यांच्या ‘ये जवानी है दिवानी’ चित्रपटातील ‘बलम पिचकारी’ या गाण्यातील ओळ आहे.