Gas Stove Cleaning: गॅस शेगडीवर दूध सांडल्यावर तुम्हीही 'ही' मोठी चूक करताय का?

गॅस शेगडीवर दूध किंवा पाणी सांडल्यावर आपण लगेच पुसून गॅस पेटवतो, पण ही खूप मोठी चूक आहे. शेगडी पूर्ण स्वच्छ करून ती कोरडी होईपर्यंत थांबलं पाहिजे. गॅसचा वास येत असेल तर थेट मेकॅनिकला बोलावणं कधीही चांगलं.

स्वयंपाकघरात गॅस शेगडीवर दूध उतू जाणं, पाणी किंवा सांबार सांडणं ही खूपच कॉमन गोष्ट आहे. पण अनेकदा शेगडीवर काही सांडलं की आपण लगेच गॅस बंद करतो आणि पुसून घेतो. याच घाईत आपल्याकडून एक मोठी चूक होते.

फक्त गॅस बंद करणं पुरेसं नाही

होय, गॅस शेगडी स्वच्छ करण्याची पद्धत थोडी वेगळी असते. शेगडीवर काही सांडलं की बहुतेकांना सवय असते ती लगेच कपड्याने पुसून पुन्हा गॅस पेटवण्याची. पण असं कधीच करू नका. पाणी किंवा दूध सांडल्यावर काही काळजी घेणं खूप गरजेचं असतं.

मग नक्की काय करावं?

शेगडीवर पाणी किंवा दूध सांडल्यास सर्वात आधी गॅस बंद करा. सांडलेलं दूध किंवा पाणी फक्त वरच्या भागापुरतं मर्यादित राहत नाही. ते शेगडीच्या आतल्या भागातही पसरू शकतं. त्यामुळे आधी ते कुठपर्यंत गेलंय याचा अंदाज घ्या.

शेगडी स्वच्छ करा

त्यानंतर शेगडी व्यवस्थित स्वच्छ करून घ्या. सुक्या कपड्याने ओलावा पुसून काढा. दूध सांडलं असेल तर ते पूर्णपणे साफ करा, कारण ते सुकल्यावर चिकट होतं. हे सगळं केल्यावर आपण जी सर्वात मोठी चूक करतो, ती म्हणजे लगेच गॅस पेटवणं.

लगेच गॅस पेटवू नका

शेगडी साफ केल्यावर लगेच गॅस पेटवण्याची घाई करू नका. उरलेला ओलावा सुकण्यासाठी काही मिनिटे वाट पाहा. पाणी किंवा दूध शेगडीच्या अशा भागात पोहोचू शकतं जिथे आपल्याला ओलावा दिसत नाही. अशा वेळी शेगडी बाहेरून कोरडी वाटली तरी थोडा वेळ थांबणं उत्तम. दूध किंवा पाणी सांडल्यावर लगेच गॅस पेटवण्याऐवजी आधी शेगडी पूर्ण स्वच्छ करून ती सुकू द्या.

थोडा वेळ वाट पाहा

काही वेळा जास्त पाणी सांडल्यास गॅसची ज्योत आपोआप विझते. अशा वेळी तुम्ही कितीही प्रयत्न केला तरी गॅस पेटत नाही. या परिस्थितीत गॅस चालू करू नका. थोडा वेळ वाट पाहा आणि मगच गॅस चालू करा.

थोडा वेळ सुकू देऊनही जर गॅस पेटत नसेल, तर समस्या फक्त वरच्या ओलाव्याची नाही. अशा वेळी बर्नर आणि नॉबसारखे सहज काढता येणारे भाग बाजूला काढून तिथे पाणी किंवा दूध अडकलंय का ते तपासा.

सावधान!

एवढंच नाही, तर शेगडी साफ केल्यानंतर जर गॅसचा वास येत असेल, तर तो पुन्हा पेटवण्याचा प्रयत्न अजिबात करू नका. गॅस लगेच बंद करा आणि थोडा वेळ वाट पाहा. जर गॅस गळती होत असेल तर सतत वास येत राहील. अशा वेळी स्वतःच दुरुस्ती करत बसण्यापेक्षा तज्ज्ञांना बोलावून ते दुरुस्त करून घ्या.